मध्य रेल्वेच्या मेगाब्लॉकचा परीक्षेवर काय परिणाम, विद्यार्थी, शिक्षक-शिक्षकेतर कर्मचाऱ्यांसाठी मुंबई विद्यापीठाने घेतला मोठा निर्णय
Central Railway Mega Block : मध्य रेल्वेने तांत्रिक कामासाठी 63 तासांचा मेगा ब्लॉक जाहीर केला आहे. त्यामुळे चाकारमान्यांचेच नाही तर विद्यार्थी आणि इतर कर्मचाऱ्यांचे मेगा हाल होतील. या घडामोडीच्या पार्श्वभूमीवर मुंबई विद्यापीठाने विद्यार्थी, शिक्षक शिक्षकेतर कर्मचाऱ्यांसाठी मोठा निर्णय घेतला आहे.
मध्य रेल्वेने मेगा ब्लॉक जाहीर केला आहे. तांत्रिक कामासाठी 63 तासांचा जम्बो ब्लॉक असेल. 30 मे 2024 रोजी मध्यरात्रीपासून ठाणे स्थानकात तर सीएसएमटी ते भायखळा आणि सीएसएमटी ते वडाळा रोड या दरम्यान 36 तासांचा मेगा ब्लॉक असेल. मध्य रेल्वे आणि हार्बर रेल्वेच्या प्रवाशांना त्याचा मोठा फटका बसणार आहे. या पार्श्वभूमीवर मुंबई विद्यापीठाने विद्यार्थी, शिक्षक शिक्षकेतर कर्मचाऱ्यांसाठी मोठा निर्णय घेतला आहे.
1 जून रोजी सुट्टी
मुंबई विद्यापीठातील संलग्न शिक्षक शिक्षकेतर कर्मचाऱ्यांना उद्या सुट्टी जाहीर करण्यात आली आहे. 1 जून 2024 रोजी मध्य रेल्वेच्या मेगाब्लॉकमुळे कर्मचाऱ्यांना सुट्टीचा निर्णय घेण्यात आला आहे. पहिल्या शनिवार सुट्टी दिल्याने महिन्याच्या दुसऱ्या शनिवारी सर्व कर्मचाऱ्यांना कामावर येणे अनिवार्य असेल.
आजच्या परिक्षेवर नाही परिणाम
मध्य रेल्वेच्या मेगा ब्लॉकचा मुंबई विद्यापीठाच्या आजच्या परीक्षावर परिणाम झाला नाही. आज विविध विद्याशाखेच्या एकूण ४३ परीक्षा होत्या.परंतु आजच्या रेल्वेच्या मेगा ब्लॉकचा कोणताही परिणाम आजच्या परीक्षेवर झाला नाही. सर्व परीक्षा सुरळीत पार पडल्याची माहिती मुंबई विद्यापीठाने दिली.
- विज्ञान शाखेच्या ३ परीक्षा
- अभियांत्रिकी शाखेच्या २७ परीक्षा
- वाणिज्य व व्यवस्थापन शाखेच्या ८ परीक्षा
- मानव्य विज्ञान शाखेची १ परीक्षा
- आंतर विद्याशाखेच्या ४ परीक्षा
दोन परीक्षा पुढे ढकलल्या
रेल्वेच्या मेगा ब्लॉकमुळे मुंबई विद्यापीठाच्या उद्याच्या २ परीक्षा पुढे ढकलण्यात आल्या आहेत. मध्य रेल्वेच्या कामासाठी ३० मे २०२४ मध्यरात्रीपासून विशेष मेगा ब्लॉक घेतला जात आहे. यामुळे विद्यार्थ्यांना परीक्षा देण्यास जाणे गैरसोयीचे होणार आहे. यामुळे शनिवार दिनांक १ जून २०२४ रोजीच्या होणाऱ्या दोन परीक्षा पुढे ढकलण्यात आल्या आहेत. शनिवार दिनांक १ जून रोजी अभियांत्रिकी शाखेची सत्र ८ चा एक व बीएमएस ( ५ वर्षीय एकत्रित अभ्यासक्रम) सत्र २ चा एक अशा दोन परीक्षा होत्या. या परीक्षा पुढे ढकलण्यात आल्या आहेत. या परीक्षेच्या सुधारित तारखा लवकरच जाहीर केल्या जाणार असल्याचे विद्यापीठाने कळवले आहे.
