होळी आणि धुलीवंदनात रंगाचा बेरंग होऊ नये यासाठी कडकोट बंदोबस्त, शहराला येणार छावणीचे स्वरुप
होळी आणि धुलीवंदनादरम्यान कोणताही अनुचित प्रकार घडू नये म्हणून मुंबई पोलिसांकडून कडेकोट बंदोबस्त ठेवण्यात आला आहे. होळी आणि रंगपंचमीला मद्याच्या नशेत गाडी चालवणाऱ्यांना रोखण्यासाठी तसेच वाहतूकीच्या नियमांचं उल्लंघन करणाऱ्यांवर कारवाई करण्यासाठी शहरात ठिकठिकाणी नाकाबंदी करण्यात येणार आहे.
होळी आणि धुलीवंदनाच्या दिवशी कोणताही अनुचित प्रकार घडू नये म्हणून मुंबई पोलिसांनी कडेकोड बंदोबस्त लावला आहे. मुंबई शहर आणि उपनगर जिल्ह्यात रस्त्या रस्त्यावर चौकात पोलिसांच्या टीम बंदोबस्ताला जुंपण्यात आल्या आहेत. शहरातील संवेदनशील ठिकाणांवर पाळत ठेवण्यात आली असून पेट्रोलिंग सुरु करण्यात आले आहे. रंगाच्या या सणाला कोणतेही गालबोट लागू नये यासाठी पोलिसांनी महत्वाच्या ठिकाणांवर एसआरपीएफच्या तुकड्या तैनात करण्याचा निर्णय घेतला आहे.
मुंबई आणि उपनगरात होळी आणि रंगपंचमीच्या दिवशी रंगाचा बेरंग होऊ नये यासाठी मुंबई पोलिसांना चांगली कंबर कसली आहे. मुंबईतील संवेदनशील विभागात अधिकचा बंदोबस्त लावण्यात आला आहे. एसटी आणि बेस्टच्या बसेसना सुरक्षा जाळ्या बसविण्यात आल्या आहेत. तसेच लोकल ट्रेन आणि मेट्रो तसेच मोनोरेलची खास काळजी घेण्याचे आदेश देण्यात आले आहेत. या मुंबई आणि उपनगरात ०७ अपर पोलीस आयुक्त, १९ पोलीस उप आयुक्त,५१ सहायक पोलीस आयुक्तांची नियुक्ती करण्यात आल्या आहेत. तसेच १७६७ पोलीस अधिकारी आणि ९१४५ पोलीस अंमलदार बंदोबस्तकरीता तैनात करण्यात आले आहेत.
ड्रक एण्ड ड्राईव्ह मोहिम राबविणार
होळी आणि रंगपंचमीच्या दिवशी अनेकदा अंगावर जबदस्तीने रंग उडविल्याने वादावादीचे प्रकार घडतात. त्यामुळे वादाचे पर्यावसन कोणत्याही धार्मिक तेढीत होऊ नये याची काळजी घेण्याचे आदेश देण्यात आले होते. महत्वाच्या ठिकाणी एसआरपीएफ तुकड्या, दंगल नियंत्रण पथक, क्युआरटी टीम, बीडीडीएस टीम आणि होमगार्डसची तैनाती करण्यात आली आहे. तसेच मद्यप्राशन करुन दुचाकी आणि कार चालविणाऱ्यांवर लक्ष ठेवण्यासाठी पथके तैनात करण्यात आले आहेत. वाहतूकीच्या नियमांचे पालन होण्यासाठी ठीक ठिकाणी नाकाबंदी करण्यात आली आहे. सार्वजनिक ठिकाणी गोंधळ घालणाऱ्यांवर, महिलांशी गैरवर्तवणूक करणाऱ्यांवर आणि अनधिकृत मद्य विक्री तसेच अंमली पदार्थांचे सेवन तसेच विक्री करणाऱ्यांवरच कारवाई करण्याचे आदेश मुंबई पोलीसांनी दिले आहेत.
