हेटवणेतून अतिरिक्त 30 एमएलडी पाणी उपलब्ध तळोजा, द्रोणागिरीची पाणीबाणी संपली
भविष्यातील पाण्याची वाढती मागणी पूर्ण करण्यासाठी सिडकोतर्फे विविध लघु आणि दीर्घकालीन योजना राबविण्यात येत आहेत
नवी मुंबई : हेटवणे धरणातून अतिरिक्त 30 एमएलडी पाणीसाठा (Water) उपलब्ध झाल्यामुळे खारघर, (Kharghar) उलवे, तळोजा, (Taloja) द्रोणागिरी आणि जेएनपीए बंदर परिसरातील पाणीबाणी आता संपली आहे. या अतिरिक्त पाणीसाठ्याचा उपसा करण्यासाठी धरणाजवळ असलेल्या 50 मीटर लांबीच्या खुल्या यंत्रणेऐवजी 56 मीटर लांबीच्या बंद दाब विमोचकाची आवश्यकता होते. बंद विमोचकाचे काम 15 दिवसांच्या विक्रमी कालावधीत सिडकोने पूर्ण केले. त्यामुळे नवी मुंबईला पूर्ण दाबाने पाणीपुरवठा सुरू झाला असून पाणीटंचाईने हैराण झालेल्या नागरिकांना मोठा दिलासा मिळाला आहे.
पाणीटंचाईवर मात करण्यासाठी
हेटवणे पाणीपुरवठा योजनेद्वारे नवी मुंबईला 150 एमएलडी पाणी उपलब्ध होते. हेटवणे योजनेतून अतिरिक्त 120 एमएलडी पाण्याचा साठा सिडकोसाठी मंजूर करण्यात आला आहे. हा अतिरिक्त 120 एमएलडी वापरता यावा याकरिता हेटवणे योजनेचे २७० एमएलडीपर्यंत क्षमता वाढवणे आवश्यक आहे. याकरिता पाच वर्षांचा कालावधी अपेक्षित आहे. मात्र सध्या सुरू असलेल्या पाणीटंचाईवर मात करण्यासाठी आवश्यक उपाययोजना करण्याची टाटा कन्सल्टिंग इंजिनीयर्स लि. (टीसीई) यांची तज्ज्ञ सल्लागार म्हणून नियुक्ती करण्यात आली. टीसीईकडून हेटवणे योजनेतून अतिरिक्त 30 एमएलडी पाण्याचा तातडीने उपसा करता यावा याकरिता सध्याच्या 50 मीटर लांबीच्या खुल्या प्रणालीऐवजी 56 मीटर लांबीच्या बंद दाब विमोचकाची शिफारस करण्यात आली होती. त्यानुसार सिडकोकडून हे काम हाती घेण्यात आले होते. ते 15 दिवसांत पूर्ण करण्यात आले. त्यामुळे नवी मुंबईचा पाणीपुरवठा सुरळीत झाला आहे.
पाण्याची मागणी 289
पाणीपुरवठ्याचे स्रोत वाढवणार सिडको नोड्सना हेटवणे, मोरबे, पाताळगंगा, न्हावा-शेवा योजना आणि बारवी धरणातून पाणीपुरवठा करण्यात येतो. सिडको अधिकार क्षेत्रातील पाण्याची मागणी 289 एमएलडी आहे, परंतु 259 एमएलडी पाणी उपलब्ध होत असून 30 एमएलडीचा तुटवडा भासत आहे. वर्तमानातील तसेच भविष्यातील पाण्याची वाढती मागणी पूर्ण करण्यासाठी सिडकोतर्फे विविध लघु आणि दीर्घकालीन योजना राबविण्यात येत आहेत, अशी प्रतिक्रिया सिडकोचे व्यवस्थापकीय संचालक डॉ. संजय मखर्जी यांनी व्यक्त केली आहे.
