Vasai News : पतीसोबत बुलेटवरुन तुंगारेश्वर दर्शनाला गेली होती, दर्शन घेऊन घरी परतत असतानाच ओढणीने केला घात
श्रावण महिना सुरु असल्याने रविवारी सुट्टीनिमित्त पती-पत्नी बुलेटवरुन तुंगारेश्वर येथे महादेवाच्या दर्शनासाठी गेले होते. मात्र त्यांनंतर त्यांचे हे एकत्र दर्शन शेवटचे ठरले.
वसई / 22 ऑगस्ट 2023 : वसईत एक हृदयद्रावक घटना घडली आहे. सध्या श्रावण महिना सुरु आहे. यामुळे अनेक भाविक वसईतील तुंगारेश्वर येथे महादेवाचे दर्शन घेण्यासाठी येतात. पण दर्शनाला आलेल्या एका महिलेसोबत हृदयद्रावक घटना घडल्याचे उघडकीस आले आहे. पतीसोबत बुलेटवर बसून तुंगारेश्वर दर्शनाला गेलेल्या पत्नीचा ओढणीने घात केला. बुलेटवरुन जात असताना महिलेची ओढणी बुलेटच्या मागच्या चाकात अडकल्याने गळफास बसून तिचा मृत्यू झाल्याची धक्क्दायक घटना घडली. मुंबई अहमदाबाद महामार्गावर वसई बाफाणे हद्दीत ही घटना घडली. प्रतिमा यादव असे मयत महिलेचे नाव असून, ती कांदिवलीतील रहिवासी आहे. या घटनेमुळे कांदिवली परिसरात हळहळ व्यक्त होत आहे.
तुंगारेश्वरहून महादेवाचे दर्शन घेऊन परतत होते
कांदिवलीतील रहिवासी असलेले यादव पती-पत्नी रविवारी सुट्टी असल्याने वसईतील तुंगारेश्वर मंदिरात महादेवाचे दर्शन घेण्यासाठी गेले होते. रविवारी पहाटे महादेवाचे दर्शन घेऊन पती-पत्नी बुलेटवरुन कांदिवली येथे घरी परतत होते. कांदिवली पश्चिमेतील ईराणीवाडी येथे यादव दाम्पत्य राहते. मुंबई-अहमदाबाद महामार्गावर वसई बाफाणे हद्दीत महिलेच्या गळ्यातील ओढणी बुलेटच्या मागच्या चाकात अडकली.
ओढणी चाकात अडकल्यानंतर चाकात गुंडाळत गेली. यामुळे प्रतिमा हिच्या गळ्याला फास बसून ती खाली पडली. तिच्या डोक्याला गंभीर दुखापत झाली. तिला तात्काळ रुग्णालयात नेण्यात आले, मात्र डॉक्टरांनी तिला मृत घोषित केले. या घटनेमुळे यादव कुटुंबावर दुःखाचा डोंगर कोसळला आहे.
