तर तुमची बारामतीची सीट जाईल असं म्हणायचं का?; दीपक केसरकर यांचा पहिल्यांदाच शरद पवार यांना सवाल
कॉपी प्रकरणात दोषी असणाऱ्यांवर कारवाई केली जाईल. कॉपीमुक्त महाराष्ट्राचं अभियान पहिल्यांदाच राबवलं जातंय. अभियानाला 90 टक्क्यांपेक्षा जास्त यश आलंय. पुढच्या वर्षी यापेक्षाही कडक अभियान राबवलं जाईल.
शिर्डी : कसब्याच्या निकालावरून राष्ट्रवादीचे सर्वेसर्वा शरद पवार यांनी भाजपला डिवचलं आहे. कसब्याच्या निकालावरून देशात बदलाचा मूड असल्याचं स्पष्ट होतंय. लोकांना चेंज हवा आहे हे या निकालातून दिसून आल्याचं शरद पवार म्हणाले होते. शरद पवार यांच्या या विधानावर राज्याचे शालेय शिक्षण मंत्री दीपक केसरकर यांनी प्रत्युत्तर दिलं आहे. कसब्याच्या निकालावरून जर देशात बदलाचा मूड आहे असं समजायचं तर मग चिंचवडमध्ये राष्ट्रवादीचा पराभव झाला. मग बारामतीची तुमची सीट जाईल असं म्हणायचं का? असा सवाल दीपक केसरकर यांनी शरद पवार यांना केला आहे. ते शिर्डीत माध्यमांशी संवाद साधत होते.
पिंपरी-चिंचवडचा काही भाग बारामती मतदारसंघाचा भाग आहे. मग तुमची बारामतीची सीट जाईल असे आम्ही म्हणू का? पिंपर-चिंचवड बालेकिल्ला असताना तुम्ही का हारला याचे आत्मपरीक्षण करा. कासब्यातील नाराजीचा फायदा तुम्हाला मिळाला. रवींद्र धंगेकर सातत्याने जनतेत होते म्हणू निवडून आले. आम्ही टिळक कुटुंबातील उमेदवार देऊ शकलो नाही ही वस्तुस्थिती आहे. कासब्याच्या निकालाचा वर्षभर काय आनंद साजरा करायचा तो करा. वर्षानंतर मोदी साहेबांची लाट कशी असते हे पुन्हा तुम्हाला दिसेल, असं दीपक केसरकर म्हणाले.
खेडमध्ये मुख्यमंत्र्यांची सभा
उद्धव ठाकरे यांची खेडमध्ये सभा झाली. या सभेला प्रयत्युत्तर देण्यासाठी शिवसेनेचीही खेडमध्ये सभा होणार आहे. केसरकर यांनी त्याची माहिती दिली. मुख्यमंत्री एकनाथ शिंदे यांची येत्या 19 मार्च रोजी खेडला सभा होईल. तेव्हा या सभेला गर्दी होईलच. बाळासाहेब सुद्धा जाणाऱ्यांना कोल्हे, लांडगे म्हणत नव्हते. उद्धव ठाकरेंना शेवटपर्यंत मुख्यमंत्री राहा म्हणून सांगितलं. मात्र शरद पवार आणि राहुल गांधींवर तुमचा विश्वास होता. तुम्हाला वाटलं कुणी पदावरून काढू शकत नाही. भाजपने तुम्हाला जवळ घेण्याचा प्रयत्न केला. मात्र मोदींना तुम्ही खोटं बोलून फसवलं, असा आरोपही त्यांनी केला.
ती शालही विसरलात
साईबाबांची शाल नेऊन उद्धव ठाकरेंना पांघरली होती हे ते विसरले. ज्यांनी शाल पांघरली त्यांची सुद्धा आठवण न ठेवण्या एव्हढे कठोर झालात. मुख्यमंत्रीपद वाचवण्यासाठी बाळासाहेबांनी जे केलं ते मोदी विसरले नाहीत. तुम्ही मात्र एका मिनिटांत सगळं विसरले. सत्तेसाठी शिवसेना फोडणाऱ्यांसोबत गेलात, असा टोला त्यांनी लगावला.
विद्यार्थ्यांना पूर्ण मार्क देऊ
यावेळी त्यांनी पेपरफुटी प्रकरणावरही त्यांनी भाष्य केलं. कॉपी प्रकरणात दोषी असणाऱ्यांवर कारवाई केली जाईल. कॉपीमुक्त महाराष्ट्राचं अभियान पहिल्यांदाच राबवलं जातंय. अभियानाला 90 टक्क्यांपेक्षा जास्त यश आलंय. पुढच्या वर्षी यापेक्षाही कडक अभियान राबवलं जाईल. मुलांनी अभ्यास करूनच पास झालं पाहिजे हा आमचा कटाक्ष आहे. पेपर फुटल्याची आवई उठवली गेली. एखाद्या विद्यार्थ्याने पेपर मोबाईलवरून व्हायरल केला तरी इतरांपर्यंत पोहचू शकत नाही. ज्या मुलांकडे मोबाईल होते त्याच ठिकाणी ते जप्त करण्यात आले. मुलांना परीक्षेचे पूर्ण मार्क दिले जातील. पुन्हा पेपर घेतला जाणार नाही, असं त्यांनी स्पष्ट केलं.
