नीलेश लंके यांचे उपोषण, आई शकुंतला लंके यांच्या डोळ्यात अश्रू
या आंदोलनामुळं तीन किलो वजन कमी झालं. तो स्वतःच्या जीवावर उदार आहे.
![नीलेश लंके यांचे उपोषण, आई शकुंतला लंके यांच्या डोळ्यात अश्रू नीलेश लंके यांचे उपोषण, आई शकुंतला लंके यांच्या डोळ्यात अश्रू](https://images.tv9marathi.com/wp-content/uploads/2022/12/10023356/lanke-new-.jpg?w=1280)
अहमदनगर : गेल्या तीन दिवसांपासून राष्ट्रवादी काँग्रेसचे आमदार नीलेश लंके यांचे उपोषण सुरू आहे. जिल्ह्यातील राष्ट्रीय महामार्गाचं बांधकाम त्वरित सुरू व्हावं, ही त्यांची प्रमुख मागणी आहे. उपोषणाच्या तिसऱ्या दिवशी लंके यांच्या आई शकुंतला लंके मुलाला भेटावयास आल्या. यावेळी त्यांना अश्रू अनावर झाले होते. लंके यांच्या आई म्हणाल्या, तीन दिवसांपासून माझ्या मुलानं अन्नाचा कण घेतला नाही. त्यानं पाणी घेतलं नाही. त्यामुळं मलाही रात्रभर झोप येत नाही. तरीही सरकार या आंदोलनाची दखल घेताना दिसत नाही.
रात्री दोन-तीन वाजता घरी येतो. आंघोळ करतो. परत सकाळी सहा वाजता उठतो. समाजासाठी तो हे सारं करतो. आम्हाला रात्रभर झोप येत नाही. पण, सरकार दखल घेत नसल्याचंही लंके यांच्या आईचं म्हणणंय.
या आंदोलनामुळं तीन किलो वजन कमी झालं. तो स्वतःच्या जीवावर उदार आहे. पण, हे सारं समाजसेवेसाठी करत असल्याचं लंके यांच्या आईनं म्हंटलंय. माझं स्वतःचं काहीही झालं तरी चालेल. पण, मी माघार घेणार नाही, असा त्याचा स्वभाव आहे. सरकार माझ्या मुलाचा काही विचार करत नाही. त्यामुळं काय सांगणार, असंही त्या म्हणाल्या.
कालही काही निर्णय झाला नाही. त्यामुळं मला दोन दिवसांपासून झोप लागत नाही. पण, सरकार निर्णय घेत नसल्यानं खंत व्यक्त केली.
नीलेश लंके म्हणाले, आम्ही समाजासाठी आंदोलन करत आहोत. आपला मुलगा तीन दिवसांपासून उपाशी असल्यानं आईला वाईट वाटणार हे स्वाभाविक आहे. ज्यासाठी लढाई उभारली त्यात यश मिळालं पाहिजे. ४६७ लोकांचा अपघाती मृत्यू झाला. हजारो लोकं अपंग झाले. नगर-शिर्डी रस्त्यावर दोनशे ते अडीचशे लोकं मृत्यूमुखी पडले. त्यांना न्याय देण्याची हीच वेळ आहे.