Sangli Murder : सांगलीत गळा दाबून महिलेचा खून, उसाच्या फडात आढळला मृतदेह
दररोजच्या प्रमाणे त्या सुमारे पाच साडेपाचच्या दरम्यान शेतात असलेल्या म्हसोबा मंदिराकडे दर्शन घेण्यासाठी गेल्या होत्या. परंतु बराच वेळा झाला तरीही त्या घरी न परतल्याने नातेवाईकांनी त्यांचा शोध सुरू केला. त्यानंतर बराच वेळ शोध घेतल्यानंतर घरापासून जवळपास 300 मीटर अंतरावर असलेल्या उसाच्या शेतात त्यांचा मृतदेह सापडला.
सांगली : मिरज तालुक्यातील बेडग येथील मंगसुळी रस्त्यावरील लकडे मळा येथे उसाच्या शेतात वृध्द महिलेचा मृतदेह (Deadbody) आढळला आहे. वासंती श्रीकांत देशींगे-लकडे (62) असे या मृत महिलेचे नाव आहे. याप्रकरणी मिरज ग्रामीण पोलीस ठाण्यात अज्ञात व्यक्ती विरोधात खुनाचा गुन्हा दाखल करण्यात आला आहे. मयत वासंती देशींगे या नेहमीप्रमाणे पहाटे मंदिरात देवदर्शनासाठी गेल्या होत्या. यावेळी या महिलेला आधी मारहाण (Beating) करण्यात आली. त्यानंतर गळा दाबून तिची हत्या (Murder) करण्यात आली. मात्र ही हत्या कुणी आणि कोणत्या कारणासाठी केली हे अद्याप स्पष्ट होऊ शकले नाही. पोलिस याबाबत अधिक तपास करीत आहेत.
नेहमीप्रमाणे म्हसोबा मंदिरात दर्शनासाठी गेली होती मयत महिला
वासंती देशींगे या गेल्या 35 वर्षांपासून त्यांचा भाऊ विनायक व सुधाकर लकडे यांच्या घरी राहात होत्या. दररोजच्या प्रमाणे त्या सुमारे पाच साडेपाचच्या दरम्यान शेतात असलेल्या म्हसोबा मंदिराकडे दर्शन घेण्यासाठी गेल्या होत्या. परंतु बराच वेळा झाला तरीही त्या घरी न परतल्याने नातेवाईकांनी त्यांचा शोध सुरू केला. त्यानंतर बराच वेळ शोध घेतल्यानंतर घरापासून जवळपास 300 मीटर अंतरावर असलेल्या उसाच्या शेतात त्यांचा मृतदेह सापडला. त्यानंतर नातेवाईकांनी मिरज ग्रामीण पोलिसांना याची माहिती दिली. मिरज ग्रामीणचे पोलीस निरीक्षक चंद्रकांत बेदरे व सहायक पोलिस निरीक्षक सरोजिनी चव्हाण यांनी घटनास्थळी धाव घेऊन पंचनामा केला. मृतदेह शवविच्छेदनासाठी शासकीय रुग्णालयात पाठविला. या महिलेचा लाथाबुक्क्यांनी मारहाण करीत गळा दाबून हत्या केल्याचे शवविच्छेदन अहवालात समोर आले आहे. याबाबत अधिक तपास पोलीस यंत्रणा करीत आहे.
