प्रकाश आंबेडकर यांची जहरी टीका, भाजप नागनाथ तर काँग्रेस सापनाथ
मी काँग्रेसवर टीका करतो. पण, सर्वाधिक टीका भाजपवर करतो हे त्यांना दिसत नाही का? आम्ही कोणत्याही बॉसला उत्तरदायी नाही. आम्ही फक्त आमच्या लोकांना जबाबदार आहोत. आम्ही कोणत्याही बाहुल्याच्या तालावर नाचत नाही. आम्ही कोणाचे चमचे नाही. आम्ही स्वतंत्र आहोत.
![प्रकाश आंबेडकर यांची जहरी टीका, भाजप नागनाथ तर काँग्रेस सापनाथ प्रकाश आंबेडकर यांची जहरी टीका, भाजप नागनाथ तर काँग्रेस सापनाथ](https://images.tv9marathi.com/wp-content/uploads/2024/06/PRAKASH-AMBEDKAR-.jpg?w=1280)
लोकसभा निवडणुकीत महाविकास आघाडीसोबत वंचित बहुजन आघाडीची युयी झाली नाही. त्यामुळे वंचितला स्वतंत्र निवडणूक लढवावी लागली. काँग्रेस पक्षाचे समर्थक वंचित बहुजन आघाडी ही भाजपची बी टीम असल्याची टीका करत आहेत. यावरून वंचितचे अध्यक्ष प्रकाश आंबेडकर यांनी ट्विटरच्या माध्यमातून संताप व्यक्त केला आहे. मी भाजपची बी टीम आहे तर पैसा कुठे आहे? मी पुण्यात एका माफक 2 बीएचके फ्लॅटमध्ये राहतो. वंचित बहुजन आघाडी आणि माझ्या वैयक्तिक मालमत्तेची माहिती सार्वजनिक डोमेनमध्ये आहे. ती कोणीही मिळवू शकतो. भाजपची ऑफर मी असंख्य वेळा नाकारल्याचे काळाने दाखवून दिले. भाजपची बी टीम असल्याचा आरोप करणाऱ्यांनी आमच्या मुंबईतील पक्ष कार्यालयात यावे. आमचे पार्टी ऑफिस तुमच्या भव्य आधुनिक बाथरूमपेक्षा लहान आहे. आमचा पक्ष सर्वसामान्यांकडून मिळणाऱ्या देणग्यांवर चालतो अशा शब्दात टीका केली.
आये दिन सोशल मीडिया पर Congress समर्थकों द्वारा मुझ पर और VBA पर BJP की B-टीम होने का आरोप लगाए जाते हैं।
क्या मैं BJP की B-टीम हूं? — मैं बार-बार एक ही सवाल का जवाब देते-देते थक गया हूं।
ये जातिवादी आरोप हर भारतीय मुसलमान से पूछे जाने वाले सवाल से बहुत मिलता-जुलता है — क्या… pic.twitter.com/RkFYp4s3rB
— Prakash Ambedkar (@Prksh_Ambedkar) June 13, 2024
सोशल मीडियावर दररोज काँग्रेस समर्थक माझ्यावर आणि वंचित बहुजन आघाडीवर भाजपची बी टीम असल्याचा आरोप करतात. मी भाजपची बी टीम आहे का? त्याच प्रश्नांची वारंवार उत्तरे देऊन थकलो आहे. भाजपची बी टीम असल्याचा आरोप करणाऱ्यांचा युक्तिवाद काय? ते म्हणतात की मी निवडणूक लढवतो म्हणून मी भाजपची बी टीम आहे. या लोकांना एकच सांगायचे आहे की मी निवडणूक का लढू नये? भारतात द्विपक्षीय व्यवस्था आहे का? काँग्रेस समर्थकांना द्विपक्षीय व्यवस्था हवी असेल तर त्यांच्या जातीयवादी आणि हुकूमशाही धन्यांना लोकप्रतिनिधी कायदा 1950 बदलायला सांगा असे खुले आव्हान त्यांनी दिले.
मी काँग्रेसवर टीका करतो. पण, सर्वाधिक टीका भाजपवर करतो हे त्यांना दिसत नाही का? असा सवाल करून प्रकाश आंबेडकर म्हणाले, फुले-शाहू-आंबेडकर आपल्या हृदयात आणि विचारांत आहेत. मग माझ्यावर बी-टीम असल्याचा आरोप कशाच्या आधारावर करता? हा जातीय आरोप प्रत्येक भारतीय मुस्लिमाला विचारलेल्या प्रश्नासारखाच आहे. जसे की, तुम्ही दहशतवादाच्या विरोधात आहात का? मी पुढे जाऊन विजयी व्हावे असे काँग्रेसला वाटत नाही. मी कधीही भाजपसोबत जाणार नाही. मला एकटे जावे लागले. संविधान वाचवण्याचे आणि दलित, आदिवासी, ओबीसी, मुस्लिम यांच्या हक्कांचे रक्षण करण्याचे काम महाराष्ट्रात आमच्यापेक्षा चांगले कोणी करू शकत नाही. आम्ही कोणत्याही बॉसला उत्तरदायी नाही. आम्ही फक्त आमच्या लोकांना जबाबदार आहोत. आम्ही कोणत्याही बाहुल्याच्या तालावर नाचत नाही. आम्ही कोणाचे चमचे नाही. आम्ही स्वतंत्र आहोत आणि आमच्याकडे स्वतंत्र नेतृत्व आहे असे प्रत्युत्तरही त्यांनी कॉंग्रेसला दिले.
जर तुम्ही आम्हाला मतदान केले असते तर आम्ही संविधान वाचवण्यासाठी उभे राहिलो नसतो का? विचार करा! त्यांनी नव्हे तर संविधान वाचवण्यासाठी आम्ही लढा सुरू केला. त्यांना राज्यघटना वाचवायची असती तर त्यांनी प्रथमतः ते नष्ट केले नसते. भाजप आणि काँग्रेस एकाच नाण्याच्या दोन बाजू आहेत. भाजप आपला अजेंडा लपवत नाही आणि उघडपणे फुटीरतावादी अजेंडाचा प्रचार करत आहे. काँग्रेस आपला खरा अजेंडा लपवते. हसतमुख बहुजनांना अडकवून त्यांचा गैरफायदा घेतात. बहुजन फसले की काँग्रेस आपले विषारी दात दाखवते. भाजप नागनाथ तर काँग्रेस सापनाथ आहे अशी जहरी टीकाही प्रकाश आंबेडकर यांनी केली. माझे संपूर्ण आयुष्य वर्णद्वेष, भेदभाव आणि दडपशाहीने पीडित लोकांच्या राजकीय हक्कांसाठी लढण्यासाठी समर्पित केले आहे. निवडणुकीच्या निकालाची पर्वा न करता मी लढत राहीन. मी वचन देतो की मी परत येईन. वंचित परत येईल. आम्ही परत येऊ, असा दावाही त्यांनी केला.