भाजपच्या रक्तातच मुस्लीम बांधवांविषयी विष, जनतेनं त्यांना जाब विचारावा: दत्तात्रय भरणे
राज्यमंत्री दत्तात्रय भरणे हे कधीच कोणत्या पक्षावर डायरेक्ट टीका करताना दिसून आलेले नाही. मात्र, त्यांनी आज भाजपवर जहरी टीका केलीय.
पुणे (इंदापूर): राज्यमंत्री दत्तात्रय भरणे हे कधीच कोणत्या पक्षावर डायरेक्ट टीका करताना दिसून आलेले नाही. मात्र, त्यांनी आज भाजपवर जहरी टीका केलीय. दत्तात्रय भरणे यांनी भाजप पक्ष हा जातीयवादी पक्ष असल्याची टीका केली आहे. भाजप पक्ष जातीय वादी पक्ष असून त्यांच्या रक्तातच मुस्लीम बांधवांबद्दल विष आहे. जातीयवादी भाजप पक्षाला आपण जाब विचारला पाहिजे, असे म्हणत दत्तात्रय भरणे यांनी भाजपवर कडकडून टीका केली आहे.
दत्तात्रय भरणे नेमकं काय म्हणाले
” काही पक्ष जातीपातीच धर्माचं वेगळ्या प्रकारे विष पेरतात. मुस्लीम बांधवांवर खोटे आरोप करतात. काही मंडळी व काही पक्षांचे प्रमुख हे त्यांवर ठपका ठेवतात. शेवटी मुस्लीम असो वा हिंदू रक्त एकच आहे. आपण इंदापूर तालुक्यामध्ये हिंदू-मुस्लीम कधी मानत नाही. एकमेकांवर भावाप्रमाणे प्रेम करतो. परंतु काही पक्षांचे मंडळी मतांच्यासाठी हिंदू आणि मुस्लिम करतात, असं दत्तात्रय भरणे म्हणाले.
भाजपला जाब विचारायला हवा
जे आजचे दंगे चालले आहेत त्यामागे मोठे षड्यंत्र आहे. मुंबईमध्ये काही गोष्टी चालल्या आहेत. कुठेतरी एका कुटुंबाला विशिष्ट आडनाव असल्याकारणाने टार्गेट केलं जातं, याचा कुठेतरी विचार केला पाहिजे. ज्यांच्या रक्तातच किंवा त्यांच्या मेंदू मध्येच मुस्लीम बांधवांबद्दल विष आहे अशा भाजप सारख्या जातीयवादी पक्षाला आपण जाब विचारला पाहिजे, असं दत्तात्रय भरणे म्हणाले. मतासाठी ही काही पक्षांची मंडळी विष पेरून मन कुलषित करून दंगे घडवण्याचा प्रयत्न करत आहेत. त्यापासून आपण सावध राहिले पाहिजे, असं राज्यमंत्री दत्तात्रय भरणे यांनी म्हटलंय.
इंदापूर शहरातील पालखी महामार्गावर शिल्पांचा लोकार्पण सोहळा राज्यमंत्री दत्तात्रय भरणे यांच्या हस्ते करण्यात आला. कै.अजित ढवळे-पवार पुण्यतिथीनिमित्त आयोजित करण्यात आलेल्या कार्यक्रमात राज्यमंत्री भरणे बोलत होते.
इतर बातम्या:
Dattatray Bharane slam BJP stand over Muslim Community