Pune CBI | मणिपूर हत्याकांड प्रकरणात पुणे कनेक्शन, ‘मास्टरमाइंड’पर्यंत पोहचले सीबीआय

cbi

Image Credit source: tv9 marathi

पुणे | 14 ऑक्टोंबर 2023 : मणिपूरमध्ये गेल्या अनेक महिन्यांपासून हिंसाचार सुरु आहे. हा हिंसाचार रोखण्यासाठी सरकारकडून प्रयत्न केले जात आहे. सप्टेंबर महिन्यात मणिपूरमध्ये दोन विद्यार्थ्यांचे अपहरण झाले होते. त्यानंतर त्यांची हत्या झाली होती. यासंदर्भातील एक व्हिडिओ व्हायरल झाला होता. या व्हिडिओनंतर देशभरात खळबळ माजली होती. केंद्र सरकारने या प्रकरणाचा तपास केंद्रीय गुन्हे अन्वेषण विभागाकडे दिला. आता सीबीआय या प्रकरणातील ‘मास्टरमाइंड’ पर्यंत पोहचले. या प्रकरणात त्या आरोपीचे पुणे कनेक्शन समोर आले.

काय केली सीबीआयने कारवाई

मणिपूर हत्याकांड प्रकरणीत CBI कडून गेल्या काही दिवसांपासून आरोपींचा शोध सुरु होता. या प्रकरणातील आरोपींनी मणिपूरमधील 17 वर्षीय विद्यार्थी हिजाम लिनथोइंगंबी आणि 20 वर्षांचा फिजाम हेमजीत यांचे अपहरण केले होते. त्यानंतर 25 सप्टेंबर रोजी त्यांची हत्या झाल्याचा व्हिडिओ समोर आला. या प्रकरणी सीबीआयने तपास सुरु केल्यानंतर चार आरोपींना अटक केली होती. पाओमिनलुन हाओकिप, एस. मालस्वान हाओकिप आणि दोन महिला लिंग्नेइचोन बैतेकुकी आणि टिननेइलिंग हेन्थांग यांना एक ऑक्टोंबर रोजी अटक केली होती. परंतु मास्टरमाइंड फरार होता.

अखेर ‘मास्टरमाइंड’ला पकडले पुण्यात

मणिपूरमधील दोन तरुणांचे अपहरण करत हत्या केल्या प्रकरणी CBI कडून ‘मास्टरमाइंड’ ला अटक केली. पुणे येथे येऊन त्या व्यक्तीला सीबीआयने अटक केली. पुण्यातून 11 ऑक्टोबर रोजी सीबीआयने त्याला पकडले होते. 22 वर्षीय पाओलुनमांग याला अटक करुन न्यायालयात हजर केले. न्यायालयाने त्याला 16 ऑक्टोबरपर्यंत सीबीआयची कोठडी दिली. मणिपूरमधील दोन विद्यार्थ्यांचे अपहरण आणि हत्याकांड प्रकरणाचा त्याचावर आरोप आहे.

पाओलुनमांग पुण्यात लपला होता…

पाओलुनमांग गेल्या अनेक दिवसांपासून पुण्यात लपून बसल्याची माहिती सीबीआयला मिळाली होती. त्यानंतर सीबीआयचे पथक पुणे शहरात दाखल झाले. त्याला अटक करुन दिल्लीत नेले. न्यायालयाने त्याला सीबीआय कोठडी दिली. पाओलुनमांग याला पुण्यातून कोणी मदत केली का? याचाही शोध सीबीआय घेणार आहे. आरोपीच्या सीबीआय कोठडीतून ही माहिती उघड होण्याची शक्यता आहे.