त्या दिवशी नाव पण आमचेच अन् चर्चा पण आमचीच असणार, राष्ट्रवादीच्या नेत्याची पोस्ट व्हायरल; बंडाच्या तयारीत?
या पोस्टसोबत बनसोडे यांनी मुख्यमंत्री एकनाथ शिंदे यांचा एक व्हिडीओ शेअर केला आहे. जणांसाठी राब राबतो... हे गाणं असलेला व्हिडीओ त्यांनी शेअर केला आहे. या व्हिडीओत बनसोडे हे मुख्यमंत्र्यांसोबत दिसत आहेत.
चिंचवड: राज्याच्या राजकारणात पुन्हा एकदा भूकंप होण्याची शक्यता आहे. ऐन पिंपरी चिंचवड महापालिकेच्या तोंडावर राष्ट्रवादीत मोठी फूट पडण्याची शक्यता वर्तवली जात आहे. राष्ट्रवादीचे आमदार अण्णा बनसोडे यांच्या फेसबुकवरील एका पोस्टने ही चर्चा रंगली आहे. बनसोडे यांनी फेसबुकवर मुख्यमंत्री एकनाथ शिंदे यांचा व्हिडीओ पोस्ट करत एक पोस्ट लिहिली आहे. त्यावरून अण्णा बनसोडे मोठा निर्णय घेण्याच्या तयारीत असल्याचं दिसत असून त्यामुळे राजकीय तर्कवितर्कांना उधाण आलं आहे.
काय आहे पोस्ट?
ज्या दिवशी काहीतरी नवीन सुरू करेल ना, त्या दिवशी नाव पण आमचं आणि चर्चा पण आमचीच असणार. माननीय मुख्यमंत्री एकनाथ भाई शिंदे….माननीय आमदार अण्णा साहेब बनसोडे… राजकरणापलीकडची मैत्री, असं या फेसबुक पोस्टमधून म्हटलं आहे. ही पोस्ट लिहून बनसोडे यांनी मुख्यमंत्री एकनाथ शिंदे यांना टॅग केलं आहे. तसेच पोस्टवर BHAI & BOSS हे दोन हॅशटॅग वापरण्यात आले आहेत.
पोस्टचा अर्थ काय?
राष्ट्रवादीचे पिंपरीचे आमदार अण्णा बनसोडे यांनी उघड उघडपणे मुख्यमंत्री एकनाथ शिंदे यांचं नाव घेऊन ही पोस्ट लिहिली आहे. तसेच पोस्टमधून शिंदे गटात जाणार असल्याचे संकेतही दिले आहेत. बनसोडे यांनी शिंदे यांना भाई संबोधलं आहे.
तसेच काही तरी नवीन सुरू करणार असल्याचं म्हटलं आहे. जेव्हा नवीन काही तरी सुरू करू तव्हा आपलीच चर्चा होणार असल्याचा दावा त्यांनी केला आहे. हा राष्ट्रवादीसाठी सूचक इशारा असल्याचं म्हटलं जात आहे.
anna bansode
किती लोक फुटणार?
बनसोडे फुटणार असल्याचे संकेत मिळत आहेत. पण शिंदे गटात कधी जाणार हे त्यांनी अद्याप स्पष्ट केलं नाही. तसेच त्यांच्यासोबत कोण जाणार हेही स्पष्ट नाही. परंतु, बनसोडे यांच्यासोबत पिंपरी चिंचवड महापालिकेतील अनेक नगरसेवक शिंदे गटात जाणार असल्याचं सांगितलं जात आहे.
निवडणुकीपूर्वीच बार उडणार?
दरम्यान, पिंपरी चिंचवड महापालिकेची निवडणूक कधीही लागण्याची शक्यता आहे. त्यापूर्वीच अण्णा बनसोडे सीमोल्लंघन करणार असल्याचं सांगितलं जात आहे. तसं झाल्यास पिंपरी चिंचवडमध्ये राष्ट्रवादीला मोठा फटका बसमार असल्याचं सांगितलं जात आहे.
चित्रफित काय सांगते?
या पोस्टसोबत बनसोडे यांनी मुख्यमंत्री एकनाथ शिंदे यांचा एक व्हिडीओ शेअर केला आहे. जणांसाठी राब राबतो… हे गाणं असलेला व्हिडीओ त्यांनी शेअर केला आहे. या व्हिडीओत बनसोडे हे मुख्यमंत्र्यांसोबत दिसत आहेत. थोडक्यात शिंदे यांची स्तुती करणारा हा व्हिडीओ आहे. त्यावरून बनसोडे हे राष्ट्रवादीला धक्का देणार असल्याचं स्पष्ट झालं आहे.