Pune : सीएनजी पंपामुळे गर्दी होते म्हणून टोळक्याचा धुडगूस, कर्मचाऱ्यांना मारहाण अन् दगडफेक; पुण्यातल्या नऱ्हेची घटना
सिंहगड रस्ता पोलिसांना ही घटना समजताच त्यांनी घटनास्थळी धाव घेतली. तर या घटनेचे सीसीटीव्ही फुटेज त्यांनी तपासले आहे. सकाळी ऑफिसची वेळ असल्याने एकतर वाहनांच्या रांगा लागल्या होत्या.
पुणे : एकीकडे सीएनजीचे भाव सर्वठिकाणी वाढले आहेत. त्यातच सीएनजी पंपावरच्या (CNG Pump) कर्मचाऱ्याला मारहाण झाल्याची घटना घडली आहे. नऱ्हे परिसरातील एका पंपावरील कर्मचाऱ्याला ही मारहाण झाली आहे. सीएनजी पंपामुळे वाहतूककोंडी होत असल्याचा राग मनात धरून काही काही युवकांकडून येथील पंपावरील कर्मचाऱ्याला मारहाण करण्यात आली. एवढेच नाही, तर या पंपावर दगडफेकही (Stone pelting) करण्यात आली. आज सकाळी नऊ वाजण्याच्या सुमारास हा प्रकार घडला. नऱ्हे परिसरातील युवांश गॅस स्टेशन या पंपावर सीएनजी भरण्यासाठी वाहनांची रोजच गर्दी होत असते. त्याचा परिणाम या परिसरात मोठ्या प्रमाणात वाहतुकीची कोंडी (Traffic) होते. याच रागातून एका युवकाने तेथील कर्मचाऱ्याला विचारणा केली. त्याचे पर्यवसान वादामध्ये आणि नंतर मारहाणीत झाले.
इतर साथीदारांनाही बोलावले
संबंधित युवकाने कर्मचाऱ्याला विचारणा करत मारहाण केली. त्याने त्याच्या इतर साथीदारांनाही बोलावले. जवळपास 8 ते 10 जणांच्या टोळक्याने मारहाण केली. यामध्ये कर्मचाऱ्याच्या कानाला जखम झाली आहे. अशाप्रकारे टोळक्याने दहशत निर्माण केल्यामुळे परिसरात घबराट पसरली आहे. ही घटना घडल्यानंतर पोलिसांना पाचारण करण्यात आले. सिंहगड रस्ता पोलिसांना ही घटना समजताच त्यांनी घटनास्थळी धाव घेतली. तर या घटनेचे सीसीटीव्ही फुटेज त्यांनी तपासले आहे.
सिंहगड पोलिसांकडून तपास
सकाळी ऑफिसची वेळ असल्याने एकतर वाहनांच्या रांगा लागल्या होत्या. तर त्याचवेळी सीएनजी भरण्यासाठी आलेल्या वाहनचालकांचा खोळंबा झाला होता. आधी विचारणा करत वाद घातला त्यानंतर शिवीगाळ करत हात उचलत मारहाण करण्यात आली. कमी म्हणून की काय, इतर साथीदारांना बोलावत ऐन कार्यालयीन वेळेत धुडगूस घालण्यात आला. दरम्यान, या मारहाणीमुळे परिसरात घबराट पसरली होती. या सर्व घटनेचा तपास आता सिंहगड पोलीस करीत आहेत.
