फटका चोरट्याला कल्याण रेल्वे पोलिसांनी ठोकल्या बेड्या, महिला प्रवाशांचे मोबाईल चोरायचा
खाली पडलेला मोबाईल उचलून पळून जाण्याच्या तयारीत चोरटा असतानाच फटका पॉईंटवर सध्या वेशात तैनात असलेल्या रेल्वे पोलिस शिपाई केदार यांनी त्याला पकडले. पकडले जाताच या चोरट्याने केदार यांच्या हाताचा चावा घेत पळून जाण्याचा प्रयत्न केला. मात्र त्या अवस्थेत देखील केदार यांनी त्याला पकडून ठेवले.
कल्याण : लोकलच्या दरवाजात उभे राहून प्रवास करणाऱ्या प्रवाशाच्या हातावर काठीचा फटका मारत मोबाईल (Mobile) चोरणाऱ्या आरोपीला कल्याण रेल्वे पोलिसांनी अटक (Arrest) केली आहे. पोलिसाच्या तावडीतून सुटण्यासाठी आरोपीने पोलिसाच्या हाताला चावा घेतला मात्र तरीही पोलिसांनी त्याला पकडलेच. कल्याण ते विठ्ठलवाडी दरम्यान ही घटना घडली असून अजय अर्जुन कांबळे असे या चोरट्याचे नाव आहे. न्यायालयाने त्याला 24 मार्चपर्यंत पोलिस कोठडीत ठेवण्याचे आदेश दिले आहेत. या चोरट्याच्या विरोधात वेगवेगळ्या पोलिस ठाण्यात गुन्हे दाखल असल्याची माहिती रेल्वे पोलिसांकडून देण्यात आली. धावत्या लोकलमध्ये दरवाजात उभे राहू नका, मोबाईल पाहू नका, सतर्क रहा असे आवाहन रेल्वे पोलिसांनी केले आहे. (Kalyan Railway Police arrested a thief for stealing a mobile phone in a train)
मोबाईल हिसकावण्याच्या घटनांमध्ये वाढ
लोकलच्या दरवाजात उभे राहून प्रवास करणाऱ्या प्रवाशांच्या हाताला फटका मारत त्यांचा मोबाईल हिसकावण्याच्या घटना वाढत होत्या. पोलिस आयुक्त कैशर खालिद यांच्या आदेशानंतर कल्याण रेल्वेचे वरिष्ठ पोलिस निरीक्षक वाल्मिक शार्दुल यांच्या मार्गदर्शनाखाली रेल्वे पोलिसांनी अशा घटना घडत असलेल्या फटका पॉईंटच्या ठिकाणी गस्त वाढवली होती. अंबरनाथमधील रहिवासी असलेले मनिष होटचंदानी सोमवारी संध्याकाळी आठ वाजण्याच्या सुमारास मोबाईल हातात पकडून ट्रेनच्या दरवाजात उभे राहून प्रवास करत होते. कल्याण ते विठ्ठलवाडी दरम्यान ट्रक क्रॉस करत असल्यामुळे लोकलचा वेग कमी झाल्याचा फायदा घेत ट्रॅकशेजारी उभ्या असलेल्या आरोपीने आपल्या हातातील लाकडी दांड्याचा फटका होटचंदानी यांच्या हातावर मारला, ज्यामुळे त्याच्या हातातील मोबाईल खाली पडला.
पळून जाण्याच्या तयारीत असताना पोलिसांना मुसक्या आवळल्या
खाली पडलेला मोबाईल उचलून पळून जाण्याच्या तयारीत चोरटा असतानाच फटका पॉईंटवर सध्या वेशात तैनात असलेल्या रेल्वे पोलिस शिपाई केदार यांनी त्याला पकडले. पकडले जाताच या चोरट्याने केदार यांच्या हाताचा चावा घेत पळून जाण्याचा प्रयत्न केला. मात्र त्या अवस्थेत देखील केदार यांनी त्याला पकडून ठेवले. या आरोपीच्या नावावर टिळकनगर पोलीस ठाण्यात 3 तर खडकपाडा पोलीस ठाण्यात 2 गुन्ह्याची नोंद असल्याचे रेल्वेचे वरिष्ठ पोलीस निरीक्षक शार्दुल वाल्मिक यांनी सांगितले. या आरोपीला रेल्वे न्यायालयाने 24 मार्चपर्यंत पोलिस कोठडीत ठेवण्याचे आदेश दिले आहेत. (Kalyan Railway Police arrested a thief for stealing a mobile phone in a train)
इतर बातम्या
CCTV Video: दोन मित्र बोलत राहीले आणि वरुन मृत्यू कोसळला, एकाचा जागेवर जीव गेला, घटना कॅमेऱ्यात कैद