Maharashtra Breaking News LIVE 22 December 2024 :योगेश कदम यांची खेडमध्ये राजेशाही मिरवणूक

Maharashtra Political News LIVE : महाराष्ट्रात विधानसभा निवडणुकीत महायुतीला बहुमत मिळाल्यानंतर देवेंद्र फडणवीस यांनी मुख्यमंत्रि‍पदाची शपथ घेतली. मुख्यमंत्री देवेंद्र फडणवीस यांच्या नेतृत्वात महायुती सरकारचा पहिला मंत्रिमंडळ विस्तार पार पडला. यावेळी महायुतीच्या 39 मंत्र्यांनी शपथ घेतली. यात 33 कॅबिनेट मंत्री तर 6 राज्य मंत्र्यांचा समावेश आहे. आता काल रात्री उशिरा या मंत्र्यांना खातेवाटप करण्यात आले. महायुतीच्या खातेवाटपात देवेंद्र फडणवीसांनी स्वत:कडे गृह, ऊर्जा (अपारंपरिक ऊर्जा वगळून), विधी आणि न्याय, सामान्य प्रशासन, माहिती आणि जनसंपर्क विभाग आणि इतर मंत्र्यांना नेमून न दिलेली उर्वरित खाती ठेवली आहेत. तर उपमुख्यमंत्री एकनाथ शिंदे यांना नगरविकास आणि गृहनिर्माण या दोन महत्त्वाच्या खात्यांसह सार्वजनिक बांधकाम (सार्वजनिक उपक्रम) हे महत्त्वाचे खाते देण्यात आले आहे. त्यासोबतच उपमुख्यमंत्री अजित पवार यांना अर्थ आणि नियोजनसह राज्य उत्पादन शुल्क खाते देण्यात आले आहे. आता सध्या महायुतीत पालकमंत्रिपदावरुन रस्सीखेंच पाहायला मिळत आहे. तर दुसरीकडे छगन भुजबळ हे मंत्रिपद न मिळाल्याने नाराज आहेत. त्यांनी आज ओबीसी नेत्यांची आज महत्त्वाची बैठक बोलवली आहे. तर दुसरीकडे महाराष्ट्रात ठिकठिकाणी धुक्याची चादर पसरली आहे. त्यामुळे वातावरणात गारठा निर्माण झाला आहे. यांसह अनेक महत्त्वाच्या घडामोडी जाणून घेण्यासाठी हा ब्लॉग दिवसभर फॉलो करा.