अल्पवयीन तरुणीचा विनयभंग, युवासेनेच्या कार्यकर्त्याला नागरिकांचा चोप

यवतमाळ : यवतमाळ शहरात एका अल्पवयीन तरुणीशी लगट करण्याचा प्रयत्न करुन, विनयभंग करणाऱ्या युवासेनेच्या (Yavatmals Yuvasena worker molestation) कार्यकर्त्याला चोप देण्यात आला. यवतमाळच्या आयुर्वेदिक कॉलेज चौकात ही घटना घडली. नेर तालुक्यातील उत्तरवाढोना इथे राहणाऱ्या युवासेनेच्या या कार्यकर्त्यावर विनयभंगाचा आरोप आहे. या कार्यकर्त्याने त्याच्याच गावात राहणाऱ्या एका 17 वर्षीय अल्पवयीन तरुणीचा विनयभंग केल्याचा आरोप आहे. तो गेली 2 महिन्यांपासून या तरुणीचा पाठलाग करत होता. (Yavatmals Yuvasena worker molestation)

वारंवार फोन करुन भेटण्यासाठी तिला आग्रह करत होता. काल पीडित तरुणी आपल्या महाविद्यालयातून पेपर देऊन गावाकडे जात असताना,  त्याने तिला फोन करून भेटायचे आहे अशी बतावणी केली. त्या तरुणीला आयुर्वेदिक कॉलेज चौकात बोलावले आणि त्या परिसरातील एका ठिकाणी आपल्या चारचाकी गाडीत बसून तिच्याशी लगट करण्याचा प्रयत्न केला.

याप्रकाराने तरुणीने आरडाओरड करताच नारीशक्ती समितीच्या कार्यकर्त्यांनी त्याठिकाणी धाव घेतली. शिवाय उपस्थित जमावाने आरोपी युवासेनेच्या कार्यकर्त्याला पकडून चोप दिला. या मारहाणीचा व्हिडिओ सोशल मीडियावर व्हायरल झाला आहे.

संबंधित तरुणीची सुटका  करुन आरोपीला पोलिसाच्या स्वाधीन केले. पोलिसांनी आरोपीविरोधात गुन्हा दाखल केला आहे.