Court : पुलवामा हल्ल्याचा आनंद साजरा केला, आता कोर्टाने चांगलाच दणका दिला..

NIA कोर्टाने सुनावली शिक्षा

Image Credit source: सोशल मीडिया

बंगळूरु : पुलवामा हल्ल्याचा (Pulwama Attack) आनंद साजरा (Celebration) करणाऱ्या तरुणाला बंगळुरु येथील NIA कोर्टाने दणका दिला. 21 वर्षीय अभियांत्रिकीच्या विद्यार्थ्याने (Engineering Student) दहशतवादी कृत्याचे जाहीर समर्थन केले होते. फेसबूकवर (Facebook) त्याने अत्यंत अपमानजनक पोस्ट लिहित पुलवामा हल्ल्याचे सेलिब्रेशन केले होते. त्याविरोधात कोर्टात खटला चालविण्यात आला.

NIA कोर्टाने प्रकरणात आरोपी तरुणाला 5 वर्ष कारावासाची शिक्षा ठोठावली. कोर्टाने निकाल देताना मत मांडले की, तरुणाची फेसबुकवरील पोस्ट पाहता, तो भारतीय नसल्याचेच चित्र दिसते.

अतिरिक्त शहर दिवाणी व सत्र न्यायाधीश गंगाधर सी.एम यांच्या अध्यक्षतेखाली विशेष NIA कोर्टाने हा निकाल दिला. अभियोग पक्षाने, अर्थात सरकारी पक्षाने दिलेल्या ठोस पुराव्यांवरुन आरोपीने त्याच्या फेसबूकवरुन अपमानजनक मजकूर पोस्ट केल्याचे सिद्ध झाल्याचे न्यायालयाने स्पष्ट केले.

बंगळुरुमधील अभियांत्रिकी शाखेत शिक्षण घेत असलेल्या या तरुणाने पुलवामा येथे CRPF जवानांवर आत्मघाती हल्ल्याचा आनंद व्यक्त केला होता. तसेच याबाबत फेसबूकवर आक्षेपार्ह पोस्ट केली होती.

आरोपीने केवळ एक दोन अपमानकारक पोस्ट केलेल्या नाहीत. अनेक वृत्त वाहिन्यांच्या फेसबूक पेजवर जाऊन यासंदर्भातील बातम्यांवर तशाच कॉमेंट केल्या आहेत. आरोपी हा अशिक्षित नाही तर उच्च शिक्षण घेत आहे.

आरोपीने जाणीवपूर्वक अशा पोस्ट केल्याचे मत न्यायालयाने व्यक्त केले. आरोपीचे कृत्य आणि त्याची मते ही या महान राष्ट्राच्या विरोधात असल्याचे मत नोंदवत एनआय कोर्टाने आरोपी विद्यार्थ्याला 5 वर्षांच्या तुरुंगवासाची शिक्षा सुनावली.

पुलवामा हल्ल्यानंतर अपमानजनक शब्दात त्याने भारतीय फौजेची खिल्ली उडवली. हा केवळ ट्रेलर आहे आणि पिक्चर बाकी असल्याचा दावा त्याने केला. हा राम मंदिराचा अल्पसा बदला असल्याचे फेसबूकवरील पोस्टमध्ये आरोपीने लिहिले होते.