भाजप खासदाराच्या घराबाहेर सुनेने हाताची नस कापली; मुलावर गंभीर आरोप

आत्महत्येचा प्रयत्न करण्यापूर्वी अंकिताने एक व्हीडिओही शेअर केला होता. यामध्ये तिने मी आत्महत्या करत असल्याचे म्हटले होते. यानंतर अंकिता कौशल किशोर यांच्या दुबग्गा येथील घराबाहेर आली आणि हाताची नस कापून घेतली.

लखनऊ: उत्तर प्रदेशातील भाजपचे खासदार कौशल किशोर यांच्या घरातील कौटुंबिक नाट्याने आता नवे वळण घेतले आहे. कौशल किशोर यांच्या सुनेने त्यांच्या घराबाहेर येऊन आत्महत्येचा प्रयत्न केल्याची माहिती समोर येत आहे. (bjp mp kaushal kishore son ayush wife ankita try to commit suicide)

कौशल किशोर हे मोहनलालगंज मतदारसंघाचे खासदार आहेत. गेल्या काही दिवसांपासून त्यांच्या घरात कौटुंबिक वाद सुरु आहेत. याच वादातून त्यांची सून अंकिता हिने टोकाचे पाऊल उचलले. तिने कौशल किशोर यांच्या घराबाहेर येऊन स्वत:च्या हाताची नस कापली. यानंतर अंकिताला तातडीने रुग्णालयात दाखल करण्यात आले. सध्या तिच्यावर उपचार सुरु आहेत. अंकिताने आपल्या पतीवर म्हणजे कौशल किशोर यांचा मुलगा आयुष याच्यावर गंभीर आरोप केले आहेत. सध्या पोलीस याप्रकरणाचा तपास करत आहेत.

आत्महत्येचा प्रयत्न करण्यापूर्वी अंकिताने एक व्हीडिओही शेअर केला होता. यामध्ये तिने मी आत्महत्या करत असल्याचे म्हटले होते. यानंतर अंकिता कौशल किशोर यांच्या दुबग्गा येथील घराबाहेर आली आणि हाताची नस कापून घेतली.

‘मला सांगा, माझं काय चुकलं?’

अंकिता हिने सुसाईड नोटमध्ये कौशल किशोर यांच्या मुलावर आरोप केले आहेत. मी कोणाशी लढू शकत नाही कारण, माझे वडील खासदार नाहीत आणि आई आमदार नाही. माझं कोणीही ऐकून घेणार नाही. मी आजपर्यंत कोणालाही तुला हात लावू दिला नाही. तर मी तुला कशी मारु शकते? तू किती खोटं बोलत आहेस. तू आणि तुझ्या घरच्यांनी मला मरण्याशिवाय पर्याय शिल्लक ठेवलेला नाही, असे अंकिताने आपल्या सुसाईड नोटमध्ये म्हटले आहे.

घराचं भाडं भरलं नाही, गॅस लावला नाही, तू एकदाही विचार केला नाहीस मी काय खाणार? तू माझ्याकडे येणार नसशील तर मलाही तुझ्यासोबत राहायचे नाही. मी जातेय. मी तुझ्या लक्षात राहिलेच तर तुला समजेल की तुझ्यावर माझ्यापेक्षा जास्त प्रेम कोणीच केले नाही. माझ्या मृत्यूचे कारण तू आणि तुझ्या घरातील लोक आहेत, असेही अंकिताने म्हटले आहे.

योगी आदित्यनाथांना विनवणी

अंकिताने आपण मुख्यमंत्री योगी आदित्यनाथ यांच्याकडेही मदत मागितल्याचे सांगितले. मात्र, कोणीही मला दाद दिली नाही. न्यायालयाकडूनही मला दिलासा मिळण्याची शक्यता कमी आहे. मी आयुषशी बोलण्यासाठी त्याच्या घरी गेले होते. मात्र, मला त्याला भेटून दिले गेले नाही, असे अंकिताने म्हटले आहे.

(bjp mp kaushal kishore son ayush wife ankita try to commit suicide)