रिषभ पंतने 52 वर्ष जुना रेकॉर्ड मोडला

ऑस्ट्रेलियाविरुद्धच्या चौथ्या सिडनी कसोटीचा दुसरा दिवस, भारताच्या चेतेश्वर पुजारा आणि विकेटकीपर रिषभ पंतच्या खणखणीत शतकांनी गाजवला. पुजाराने 193 तर पंतने नाबाद 159 धावा ठोकल्यानंतर, भारताने पहिला डाव 7 बाद 622 धावांवर घोषित केला. त्यानंतर फलंदाजीस उतरलेल्या ऑस्ट्रेलियाने दुसऱ्या दिवसअखेर बिनबाद 24 धावा केल्या.

टीम इंडियाचा हुकमी एक्का चेतेश्वर पुजाराचं द्विशतक अवघ्या 7 धावांनी हुकलं. पुजारा 193 धावा ठोकून माघारी परतला.

आजचा दिवस खऱ्या अर्थाने रिषभ पंतने गाजवला. पंतने चांगली कामगिरीच केली नाही तर त्याने ऑस्ट्रेलियासमोर धावांचा डोंगर उभा केला. पंतने आपल्या तुफानी खेळीने नवा विक्रम रचला. आजपर्यंत भारतीय विकेटकीपरला जो विक्रम करता आला नव्हता तो पंतने केला.

रिषभ पंत ऑस्ट्रेलियात शतक ठोकणारा पहिला विकेटकीपर ठरला आहे. रिषभने आज 159 धावांची नाबाद खेळी करुन 52 वर्ष जुना रेकॉर्ड मोडित काढला.

याआधी भारताच्या फारुख इंजिनियर यांनी ऑस्ट्रेलियात सर्वाधिक धावा केल्या होत्या. 1967 मध्ये अडिलेड कसोटीत त्यांनी 89 धावा केल्या होत्या.

या यादीत माजी विकेटकीपर किरण मोरे यांचा तिसरा नंबर लागतो. त्यांनी 1991 मध्ये मेलबर्नमध्ये 67 धावांची खेळी केली होती.

टीम इंडियाचा विकेटकीपर फलंदाज पार्थिव पटेलने 2004 मध्ये सिडनी कसोटीत 62 धावा केल्या होत्या.

तर भारताचा सर्वात यशस्वी कर्णधार एम एस धोनी या यादीत पाचव्या स्थानी आहे. धोनीने 2012 मध्ये सिडनीत सर्वाधिक 57 धावा केल्या होत्या.

Choose your language

रिषभ पंतने 52 वर्ष जुना रेकॉर्ड मोडला

Network