आता ओटीटीवर दिसणार ‘मुंज्या’चा थरार; कधी अन् कुठे पाहता येईल चित्रपट?
आदित्य सरपोतदार दिग्दर्शित 'मुंज्या' या चित्रपटाच्या ओटीटी रिलीजची प्रेक्षकांना आतुरता आहे. लवकरच हा चित्रपट ओटीटीवर प्रदर्शित होणार आहे. यामध्ये राज्याचे माजी मुख्यमंत्री मनोहर जोशी यांची नात शर्वरी वाघचीही महत्त्वपूर्ण भूमिका आहे.
आदित्य सरपोतदार दिग्दर्शित 'मुंज्या' हा चित्रपट बॉक्स ऑफिसवर चांगलाच गाजतोय. या चित्रपटाने आतापर्यंत 80 कोटी रुपयांहून अधिक गल्ला जमवला. आता प्रेक्षकांच्या त्याच्या ओटीटी प्रदर्शनाची प्रतीक्षा आहे. 'मुंज्या' ओटीटीवर कधी येणार, याबद्दलची माहिती समोर आली आहे.
'मुंज्या' हा चित्रपट डिस्ने प्लस हॉटस्टारवर प्रदर्शित होईल. अभय वर्मा आणि शर्वरी वाघ यांच्या भूमिका असलेल्या या चित्रपटाचे डिजिटल राइट्स हॉटस्टारने विकत घेतले आहेत. दोन महिन्यांनंतर हा चित्रपट ओटीटीवर प्रेक्षकांच्या भेटीला येईल.
या चित्रपटाचं दिग्दर्शन मराठीत 'फास्टर फेणे', 'झोंबिवली', 'उनाड' यांसारखे विविधांगी चित्रपट देणाऱ्या आदित्य सरपोतदार यांनी केलं आहे. 'स्त्री' आणि 'भेडिया'नंतर 'मुंज्या' हा त्याच हॉरर-कॉमेडी मालिकेतला तिसरा चित्रपट आहे.
मुंज्याने आतापर्यंत जगभरात 83.46 कोटी रुपयांचा गल्ला जमवला आहे. लवकरच हा चित्रपट 100 कोटींचा टप्पा पार करणार आहे. अवघ्या 30 कोटींच्या बजेटमध्ये हा चित्रपट बनला आहे. याचं बरंचसं शूटिंग कोकणात पार पडलंय.
या चित्रपटात बऱ्याच मराठी कलाकारांनी भूमिका साकारल्या आहेत. त्यात भाग्यश्री लिमये, अजय पूरकर, सुहास जोशी यांचा समावेश आहे. याशिवाय मोना सिंग, अभय वर्मा आणि शर्वरी वाघ यांच्याही भूमिका आहेत.