सोलापूर जिल्ह्याची सहकार आणि कृषी पंढरी म्हणून ओळख असलेल्या अकलूज येथे दरवर्षी दिवाळी पाडव्याच्या मुहूर्तावर कृषी उत्पन्न बाजार समितीच्या वतीने घोडे बाजार भरवला जातो. या बाजारात जातीवंत घोडे विक्रीसाठी देशभरातून आणले जातात.
यंदा अकलूजच्या घोडे बाजारात उत्तरप्रदेश,मध्यप्रदेश,राजस्थान अशा वेगवेगळ्या राज्यातून काटेवाडी, मारवाड, पंजाब, सिंध असे जातीवंत घोडे विक्रीसाठी आले आहेत, यावर्षी जवळपास दोन हजारहून अधिक घोडे बाजारात दाखल झाले आहेत.
घोडे व्यापारी आणि ग्राहकांसाठी कृषी उत्पन्न बाजार समितीने चांगली सोय केली आहे. घोड्यांसाठी चारा ,पाणी, सावली, आरोग्य सेव तसेच चोख सुरक्षा व्यवस्था आहे. तसेच ग्राहक आणि व्यापाऱ्यांना राहण्याची सोय देखील केली आहे.
वाढत्या महागाईच्या काळातही घोडे बाजारात तब्बल पन्नास लाखाचा घोडा विक्रीसाठी आला आहे. त्यामुळे असे महागडे घोडे पाहण्यासाठी हौशी लोक, घोडे खरेदीदार, व्यापारी येऊ लागल्याने अकलुजच्या घोडे बाजाराची चर्चा देशभर पसरु लागली आहे.
उत्तरप्रदेशच्या बरेलीतून आलेल्या कोब्रा नावाच्या घोड्याची किंमत तब्बल 50 लाख रूपये आहे. या घोड्याचे पाय, शेपटी, कान डोळयाच्या कडा सुध्दा काळया आहेत. हा घोडा मारवाड जातीचा तेलीया कुम्मेत प्रकारातील असल्याचे कृषी उत्पन्न बाजार समितीचे अध्यक्ष मदनसिंह मोहिते पाटील आणि सचिव राजेंद्र काकडे यांनी सांगितले.