‘फुलाला सुगंध मातीचा’ मालिकेतील लोकप्रिय जोडी पुन्हा दिसणार एकत्र
स्टार प्रवाह वाहिनीवरील 'फुलाला सुगंध मातीचा' या मालिकेत शुभम आणि किर्तीची भूमिका साकारणारे कलाकार समृद्धी केळकर आणि हर्षद अतकरी घराघरात लोकप्रिय झाले. ही मालिका बंद झाली असली तरी ही जोडी पुन्हा एकदा प्रेक्षकांच्या भेटीला येणार आहे.
स्टार प्रवाह वाहिनीवरील 'फुलाला सुगंध मातीचा' या मालिकेतून प्रेक्षकांच्या घराघरात पोहोचलेली लाडकी जोडी म्हणजे शुभम आणि कीर्ती म्हणजेच अभिनेत्री समृद्धी केळकर आणि हर्षद अतकरी. ही जोडी आता पुन्हा एकदा एकत्र दिसणार आहे.
'मी होणार सुपरस्टार जोडी नंबर वन'च्या गुढीपाडवा विशेष भागात समृद्धीला अभिनेता हर्षद अतकरी सूत्रसंचालनात साथ देणार आहे. यंदाच्या पर्वाचं वेगळेपण म्हणजे स्पर्धक जोडीने नृत्य सादर करतात.
आई-मुलगी, गुरु-शिष्य, मामा-भाचे, बहिणी-बहिणी अशी अनेक नाती आणि त्यांची नृत्यकला या मंचावर पहायला मिळत आहे. स्पर्धकांसोबतच सूत्रसंचालनही जोडीने सादर होतंय. समृद्धीसोबतच स्टार प्रवाह परिवारातले कलाकार सूत्रसंचालकाची भूमिका पार पाडतील.
'मन धागा धागा जोडते नवा' या मालिकेतील सार्थक आणि 'साधी माणसं' मालिकेतील सत्यानंतर आता अभिनेता हर्षद अतकरी सूत्रसंचानलाची भूमिका पार पाडताना दिसेल.
समृद्धी आणि हर्षदच्या जोडीला प्रेक्षकांचं भरभरुन प्रेम मिळालं आहे. त्यामुळे ही लोकप्रिय जोडी पुन्हा एकदा पाहण्याची संधी 'मी होणार सुपरस्टार जोडी नंबर वन'चा मंच घेऊन आला आहे. हा कार्यक्रम शनिवार आणि रविवारी रात्री 9 वाजता स्टार प्रवाह वाहिनीवर प्रेक्षकांच्या भेटीला येणार आहे.