कसोटी क्रिकेटमध्ये बेन स्टोक्सच्या नावावर आणखी एका विक्रमाची नोंद, काय केलं ते वाचा
इंग्लंडने वेस्ट इंडिजविरुद्धचा तिसरा आणि शेवटचा कसोटी सामना जिंकून व्हाईटवॉश दिला. हा सामना तिसऱ्या दिवशी संपला. दुसरीकडे, या मालिकेतील विजयामुळे इंग्लंडला वर्ल्ड टेस्ट चॅम्पियनशिपमध्ये फायदाही झाला आहे. असं असताना बेन स्टोक्सच्या नावावर एका विक्रमाची नोंद झाली आहे. त्याने 43 वर्षे जुना विक्रम मोडीत काढला आहे.
इंग्लंडचा कर्णधार बेन स्टोक्सने वेस्ट इंडिजविरुद्ध आक्रमक खेळी करत माजी कर्णधाराचा विक्रम मोडीत काढला. बर्मिंगहॅमच्या एजबॅस्टन स्टेडियमव त्याने हा विक्रम आपल्या नावावर केला.
दुसऱ्या डावात वेस्ट इंडिजने फक्त 81 धावांचं लक्ष्य इंग्लंडसमोर दिलं होतं. हे सोप आव्हान असलं तरी बेन स्टोक्सने आक्रमक पवित्रा काही सोडला नाही. दोन षटकार आणि 9 चौकारांच्या मदतीने फक्त 24 धावात अर्धशतक पूर्ण केलं.
बेन स्टोक्सने इंग्लंडकडून सर्वात वेगवान अर्धशतक ठोकण्याचा विक्रम आपल्या नावावर केला आहे. यापूर्वी हा विक्रम माजी कर्णधार इयान बॉथमच्या नावावर होता. 1981 मध्ये बोथमने 28 चेंडूत अर्धशतक झळकावलं होतं. आता 43 वर्षांनी हा विक्रम मोडीत निघाला आहे.
दुसरीकडे, बेन स्टोक्स आणि बेन डकेट या जोडीने आक्रमक खेळी करत एक आणखी विक्रम नोंदवला आहे. अवघ्या 4.2 षटकात 50 धावांचा पल्ला गाठला. त्यामुळे इंग्लंड हा संघ कसोटी क्रिकेटमध्ये वेगाने 50 धावा करणारा संघ ठरला आहे.
कसोटी क्रिकेटमध्ये सर्वात जलद अर्धशतक करण्याचा विश्वविक्रम पाकिस्तानच्या मिसबाह-उल-हकच्या नावावर आहे. 2014 मध्ये ऑस्ट्रेलियाविरुद्धच्या कसोटीत मिसबाहची बॅट चांगलीच तळपली होती. मिसबाहने फक्त 21 चेंडूत अर्धशतक झळकावून हा विश्वविक्रम केला होता.
दरम्यान, इंग्लंडने वेस्ट इंडिजला तीन सामन्यांच्या कसोटी मालिकेत व्हाईटवॉश दिला आहे. त्यामुळे वर्ल्ड टेस्ट चॅम्पियनशिप गुणतालिकेत फायदा झाला आहे. आता पाकिस्तानच्या खालोखाल सहाव्या स्थानावर आहे. आता वरच्या संघात हार जीत झाली की त्याचा फायदा इंग्लंडला होईल.