Virat Kohli : रनमशिन विराट कोहली याच्यावर 1676 दिवसांचा फेरा, अजून तो तिढा कायम
भारतीय संघ सध्या वेस्ट इंडिज दौऱ्यावर असून कसोटी मालिकेत 1-0 ने आघाडी घेतली आहे. यशस्वी जयस्वाल, रोहित शर्मा आणि विराट कोहली चांगली कामगिरी केली. पण विराट कोहलीला अजून तो तिढा सोडवता आला नाही.
डोमिनिका येथील विंडसर पार्क येथे पार पडलेला पहिला कसोटी सामना भारताने एक डाव आणि 141 धावांनी जिंकला. या विजयासह भारताने 1-0 ने आघाडी घेतली आहे. यशस्वी जयस्वाल आणि रोहित शर्मा यांनी शतकं झळकावली. तर विराट कोहली याने अर्धशतकी खेळी केली.
पदार्पणाच्या सामन्यात यशस्वी जयस्वाल याने 171 धावा, रोहित शर्मा याने 103 धावा केल्या.
विराट कोहलीने 182 चेंडूचा सामना करत 5 चौकारांच्या मदतीने 76 धावा केल्या. कोहली शतक करेल अशी चाहत्यांची अपेक्षा होती. मात्र कोहलीने रहीम कॉर्नवॉलच्या गोलंदाजीवर चुकीचा फटका मारला आणि झेल बाद झाला.
विराट कोहलीचे शतक अवघ्या 24 धावांनी हुकले. त्यामुळे परदेशात शतक झळकवण्याचं शुक्लकाष्ठ कायम राहिलं. विराटला परदेशात शतक झळकावून पाच वर्षे पूर्ण झाली आहेत.
विराट कोहलीने परदेशात शेवटचं शतक 2018 साली झळकावलं होतं. ऑस्ट्रेलियाविरुद्धच्या सामन्यात कोहलीने 257 चेंडूत 123 धावा केल्या होत्या.
2018 पासून आतापर्यंत परदेशात शतक झळकवण्यात विराटला यश आलेलं नाही. म्हणजेच विराटला परदेशात शतक झळकावून 1673 दिवस उलटून गेले आहेत. आता दुसऱ्या कसोटी हे चक्रव्यूह भेदतो का याकडे क्रीडाप्रेमींचं लक्ष लागून आहे.
वेस्ट इंडिज विरुद्ध दुसरा कसोटी सामना 20 जुलैपासून सुरु होणार आहे. त्यामुळे या सामन्यात विराटकडून क्रीडारसिकांना अपेक्षा आहेत.
