बाळासाहेबांचं स्मारक आणि याकूब मेमनच्या कबरीविषयी नितेश राणे म्हणाले….

मुंबई : याकुब मेमनच्या कबरीचा एक फोटो सध्या सोशल मीडियावर व्हायरल होत आहे. त्यावर विविध प्रतिक्रिया येत आहेत. भाजपचे नेते नितेश राणे (Nitesh Rane) यांनीही यावर आपली प्रतिक्रिया दिली आहे. पण ही प्रतिक्रिया देताना त्यांनी शिवसेना पक्षप्रमुख उद्धव ठाकरेंवर जोरदार हल्ला चढवला आहे. बाळासाहेब ठाकरे यांच्या स्मारकाचा मुद्दा पुढे करत त्यांनी उद्धव ठाकरेंवर (Uddhav Thackeray) टीका केली आहे. दोन वर्षे मुख्यमंत्री असताना बाळासाहेबांचे स्मारक बांधण्याचं सोडून हे याकूब मेमनची कबर सजवत बसले, असं नितेश राणे म्हणाले आहेत.

बाळासाहेबांच्या नावाने मतं मागू नका असं उद्धव ठाकरे शिंदेगटाला वारंवार बजावताना दिसत आहेत. त्यावरही नितेश राणेंनी हल्ला चढवला आहे.

बाळासाहेबांचं स्मारक केलं नाही अन् आता म्हणतात, माझ्या बापाच्या नावाने मतं मागू नका, असं म्हणत त्यांनी ठाकरेंना टोला लगावला आहे.

शिंदेगटाने बंड केल्यानंतर उद्धव ठाकरे आणि आदित्य ठाकरे यांनी आक्रमक होत शाब्दिक हल्ला चढवला. बाळासाहेब ठाकरे यांचं नाव न घेता निवडणूक लढवा आणि राजकारण करा, असं म्हणत उद्धव ठाकरे शिंदेगटावर टीका करत असतात. त्याला नितेश राणे यांनी उत्तर दिलं आहे.

दहशतवादी कारवायांमध्ये मोठा हात असलेल्या याकूब मेमनच्या कबरीवरुन सध्या राज्याच्या राजकारणात मोठं वादंग निर्माण झालं आहे. याकूबच्या कबरीचा एक फोटसध्या सोशल मीडियावर व्हायरल होत आहे. त्यावर विविध प्रतिक्रिया येत आहेत. हे सगळं महाविकास आघाडी सरकारच्या काळात झाल्याचा आरोप भाजपकडून करण्यात येत आहे.