Ganga Mandir: भारतातल्या ‘या’ ठिकाणी आहे रहस्यमयी शिव मंदिर, पायऱ्यांवरून येतो विशिष्ट आवाज
श्रावण महिन्यात (Shrawan Month) भगवान भोलेनाथाची विशेष पूजा केली जाते. हिंदू धर्मात अशी मान्यता आहे की, भगवान शिवाला श्रावण महिना प्रिय आहे आणि या काळात भगवान शंकराची पूजा केल्यास भक्तांच्या सर्व मनोकामना पूर्ण होतात. 14 जुलैपासून श्रावण महिना सुरू होत आहे. या निमित्याने देशातील एका प्रसिद्ध आणि रहस्यमयी शिव मंदिराबद्दल (Mysterious Shiva Temple) जाणून घेऊया, […]
श्रावण महिन्यात (Shrawan Month) भगवान भोलेनाथाची विशेष पूजा केली जाते. हिंदू धर्मात अशी मान्यता आहे की, भगवान शिवाला श्रावण महिना प्रिय आहे आणि या काळात भगवान शंकराची पूजा केल्यास भक्तांच्या सर्व मनोकामना पूर्ण होतात. 14 जुलैपासून श्रावण महिना सुरू होत आहे. या निमित्याने देशातील एका प्रसिद्ध आणि रहस्यमयी शिव मंदिराबद्दल (Mysterious Shiva Temple) जाणून घेऊया, या मंदिरात भक्तांची कायमच रीघ लागलेली असते. हे मंदिर उत्तर प्रदेशातील गढमुक्तेश्वर (Gadhmukteshwar) येथे स्थित एक प्राचीन गंगा मंदिर (Ganga mandir) आहे. या प्राचीन मंदिरात माता गंगासोबतच पिता ब्रह्माजींची चार हात असलेली पांढऱ्या रंगाची मूर्ती स्थापित आहे आणि या मंदिरात एक चमत्कारी शिवलिंग देखील आहे. श्रावण महिन्यात येथे शिवपूजनासाठी भाविकांची मोठी रांग असते.
अतिप्राचीन आहे मंदिर
गढमुक्तेश्वर येथील गंगा मंदिर खूप जुने असून येथील इतिहास कोणालाच माहीत नाही. या मंदिराची स्थापना कोणी आणि केव्हा केली याबद्दल कोणालाही माहिती नाही. गढमुक्तेश्वर येथील प्राचीन गंगा मंदिराला भेट देण्यासाठी 101 पायऱ्या चढून जावे लागते.
कार्तिक महिन्यात जत्रा भरते
या मंदिरात कार्तिक महिन्यात शिवलिंगाच्या दर्शनाला अनन्यसाधारण महत्त्व आहे, मात्र श्रावण महिन्यातही भाविकांची मोठी रांग असते. मंदिरात असलेल्या शिवलिंगाबाबत अशी आख्यायिका आहे की, दरवर्षी कार्तिक महिन्यात त्यावर आपोआप एक विशेष आकृती उमटते. मंदिराच्या पुजाऱ्याच्या म्हणण्यानुसार, शिवलिंगावरील ती आकृती प्रत्येक वेळी वेगळ्या आकारात आणि रूपात प्रकट होते. आजही अनेक तज्ञ आणि शास्त्रज्ञ याचे रहस्य उलगडू शकलेले नाहीत.
मंदिराच्या पायऱ्यांवरून आवाज येतात
गढमुक्तेश्वर येथील प्राचीन गंगा मंदिर उंचावर वसलेले असून येथील पायऱ्या अतिशय गूढ दगडाने बनवलेल्या आहेत. या पायऱ्यांवर कोणीही चढतो किंवा दगड फेकतो तेव्हा पाण्यात दगडफेक झाल्यासारखा आवाज येतो. प्राचीन काळी गंगा नदीचे पाणी या मंदिराच्या पायऱ्यांपर्यंत पोहोचत असे, परंतु आता गंगा नंदी मंदिरापासून सुमारे 5 किलोमीटर दूर आहे.
(वरील माहिती उपलबध स्रोतावरून देण्यात आलेली आहे.याच्या तथ्यांबद्दल आम्ही कुठलाही दावा करीत नाही,तसेच अंधश्रद्धेला दुजोरा देत नाही)
