Gudi Padwa 2025 : गुढी ठेवण्यासाठी कोणती दिशा आहे सर्वात शुभ? जाणून घ्या!
गुढीपाडवा हा आपल्या संस्कृतीचा एक पारंपारिक सण आहे, जो मराठी नववर्षाची सुरुवात करतो. चैत्र महिन्यातील शुक्ल पक्षाच्या पहिल्या तिथीला हा उत्सव साजरा केला जातो. महाराष्ट्राच्या पारंपारिक नववर्ष सणामध्ये गुढी लावण्याचे विशेष महत्त्व आहे. या साठी जाणून घ्या कोणत्या दिशेला गुढी लावणे शुभ मानले जाते.
मराठी नवीन वर्ष आणि महाराष्ट्राचा अत्यंत महत्त्वाचा आणि पारंपरिक सण म्हणून ओळखला जाणारा गुढीपाडवा. प्रत्येक वर्षी चैत्र महिन्यात शुक्ल पक्षाच्या पहिल्या तिथीला साजरा केला जातो. या सणाच्या निमित्ताने मराठी नववर्षाची सुरुवात होते आणि सृष्टीच्या नवचक्राची ओळख होते. गुढीपाडवा हा वसंत ऋतूच्या आगमनाचे प्रतीक असून, यावर पौराणिक कथाही आधारित आहे. ब्रह्मदेवाने सृष्टीची निर्मिती केली, या स्मरणार्थ गुढीपाडव्याचा उत्सव साजरा केला जातो. लोक आपल्या घरांना स्वच्छ करून, नवीन कपडे घालून आणि गुढी उभारून सण साजरा करतात. पण तुम्हाला माहित आहे का, गुढी उभारण्यासाठी योग्य दिशा काय आहे? ही दिशा तुमच्या घराला सकारात्मक ऊर्जा आणि देवाचे आशीर्वाद कसे मिळवून देईल? चला, जाणून घेऊया!
गुढी उभारण्यासाठी कोणती दिशा शुभ आहे?
गुढीपाडवा हा हिंदू दिनदर्शिकेतील नवीन वर्ष आणि चैत्र शुक्ल प्रतिपदा तिथीच्या शुभ मुहूर्तावर साजरा केला जातो. नवीन पिकांचे आगमन, नवीन वर्षाची सुरुवात आणि ब्रह्मदेवाने विश्वाची निर्मिती केल्याचा दिवस म्हणून हा सण मोठ्या जोमात साजरा केला जातो. यावर्षी गुढीपाडवा ३० मार्च २०२५ रोजी साजरा केला जाणार आहे. गुढीपाडव्याच्या दिवशी घराच्या पूर्व दिशेला गुढी उभारणे सर्वात शुभ मानले जाते. पूर्व दिशा शुभ, ऊर्जा आणि नवीन सुरुवातीचे प्रतीक मानली जाते, कारण सूर्य याच दिशेपासून उगवतो. हे शक्य नसल्यास, गुढी ईशान्य दिशेने देखील ठेवता येते, ज्यामुळे सकारात्मक ऊर्जा आणि समृद्धी वाढते.
गुढीपाडवा हा केवळ नवीन वर्षाची सुरुवातच नाही, तर नवीन ऊर्जा, समृद्धी आणि विजयाचे प्रतीक आहे. हा सण भारतीय परंपरा, संस्कृती आणि शेतीचे महत्त्व लक्षात आणून देतो. गुढी, रांगोळी, पूजा आणि विशेष पदार्थांची स्थापना करून हा सण आनंद आणि सकारात्मकतेचा संदेश देतो. हा दिवस आपल्याला नवीन संकल्प घेऊन जीवनात पुढे जाण्याची प्रेरणा देतो.
