IND vs SA : तिसऱ्या टी20 साठी सूर्यकुमार यादवने काढला हुकूमाचा एक्का, फॉर्मात असलेल्या खेळाडूला संधी

भारत आणि दक्षिण अफ्रिका यांच्यात चार सामन्यांची टी20 मालिका सुरु आहे. या मालिकेत दोन्ही संघांनी प्रत्येकी एक सामना जिंकत 1-1 ने बरोबरी केली आहे. त्यामुळे या मालिकेचा निकाल आजच्या सामन्यावर अवलंबून आहे. आज सामना जिंकणारा संघ मालिका विजयासाठी प्रयत्न करू शकतो. तर हरणाऱ्या संघाला मालिका बरोबरीत सोडवण्यासाठी पुढचा सामना जिंकावा लागेल. अशा स्थितीत दोन्ही संघ हा सामना जिंकण्यासाठी सर्वोतोपरी प्रयत्न करतील यात शंका नाही. या सामन्यासाठी टीम इंडियात एक बदल करण्यात आला आहे. कर्णधार सूर्यकुमार यादवने नाणेफेकीचा कौल गमावल्यानंतर आणि वाटेला फलंदाजी आल्यानंतर सांगितलं की, ‘ठीक आहे. प्रथम फलंदाजी करताना आम्ही गेल्या दोन सामन्यांमध्ये चांगली कामगिरी केली आहे. खेळाडूंनी आपल्या योजना स्पष्टपणे मांडल्या आहेत आणि ते अंमलात आणत आहेत. त्यामुळे मला खरोखर आनंद झाला आहे. त्यांना स्पष्टपणे सांगितलं आहे की, मैदानात उतरा आणि आनंद घ्या. खेळाडूंनी माझे काम सोपे केले आहे. आमच्यात संघात एक बदल आहे . रमणदीपने संघात पदार्पण केलं आहे. आवेशने आमच्यासाठी चांगली कामगिरी केली पण दोन गोलंदाजांपैकी एकाला बलिदान द्यावे लागणार हे निश्चित होतं.’

नाणेफेकीचा कौल जिंकल्यानंतर दक्षिण अफ्रिकेचा कर्णधार एडन मार्करामने सांगितलं की, ‘आम्ही पुन्हा प्रथम गोलंदाजी करणार आहोत. विकेट चांगली दिसते. अजूनही आम्ही सर्वोत्तम देत नाही. आम्ही हळूहळू प्रगती करत आहोत. गेल्या सामन्यात गोलंदाजांनी चांगली कामगिरी केली. फलंदाजांना मध्यभागी वेळ घालवायला हवा आणि खूप हताश होऊ नये. आमच्या फलंदाजीवर पूर्ण विश्वास आहे आणि आशा आहे की आम्ही आज रात्री काहीतरी खास करू.’

दोन्ही संघांची प्लेइंग 11

भारत (प्लेइंग इलेव्हन): संजू सॅमसन (विकेटकीपर), अभिषेक शर्मा, सूर्यकुमार यादव (कर्णधार), तिलक वर्मा, हार्दिक पांड्या, रिंकू सिंग, अक्षर पटेल, रमणदीप सिंग, अर्शदीप सिंग, रवी बिश्नोई, वरुण चक्रवर्ती.

दक्षिण आफ्रिका (प्लेइंग इलेव्हन): रायन रिकेल्टन, रीझा हेंड्रिक्स, एडन मार्कराम (कर्णधार), ट्रिस्टन स्टब्स, हेनरिक क्लासेन (विकेटकीपर), डेव्हिड मिलर, मार्को जॅनसेन, अँडिले सिमेलेन, जेराल्ड कोएत्झी, केशव महाराज, लुथो सिपामला.