SL Vs AFG Report: सुपर 4 च्या पहिल्या सामन्यात अफगाणिस्तानची जबरदस्त फलंदाजी, पण….
SL Vs AFG Report: आशिया कप स्पर्धेत (Asia cup) श्रीलंकेचा (Srilanka) संघ विजयी मार्गावर परतला आहे. 'करो या मरो' सामन्यात त्यांनी बांगलादेशला हरवलं.
मुंबई: आशिया कप स्पर्धेत (Asia cup) श्रीलंकेचा (Srilanka) संघ विजयी मार्गावर परतला आहे. ‘करो या मरो’ सामन्यात त्यांनी बांगलादेशला हरवलं. सुपर 4 (Super 4) मध्ये पोहोचल्यानंतर श्रीलंकेच्या संघाने सलग दुसरा विजय मिळवला आहे. सुपर 4 राऊंडमध्ये श्रीलंका-अफगाणिस्तान मध्ये पहिला सामना झाला. दासुन शनाकाच्या श्रीलंकन संघाने जबरदस्त खेळ दाखवला. त्यांनी अफगाणिस्तानच्या टीमचा 5 विकेटने पराभव केला. भानुका राजपक्षा आणि कुसल मेंडिस यांनी दमदार फलंदाजी केली. त्यांच्या बळावर श्रीलंकेने अफगाणिस्तानचं 176 धावांच लक्ष्य 20 व्या षटकात पार केलं.
गुरबाजची जबरदस्त इनिंग
शारजाहच्या मैदानात शनिवारी सुपर 4 चा पहिला सामना झाला. अफगाणिस्तानचा संघ सलग दोन विजयांसह आत्मविश्वासाने मैदानात उतरला होता. श्रीलंकेच्या संघाने कसाबसा पुढच्या फेरीत प्रवेश केला होता. मोहम्मद नबीचा अफगाणिस्तान संघ फेव्हरेट म्हणून मैदानात उतरला होता. टीमचा सलामीवीर रहमानुल्लाह गुरबाज 45 चेंडूत 84 धावांची स्फोटक इनिंग खेळला. यात चार चौकार आणि सहा षटकार होते. इब्राहिम जादरानने 38 चेंडूत 40 धावा केल्या. त्या व्यतिरिक्त अफगाणिस्तानचे अन्य फलंदाज अपयशी ठरले. अफगाणिस्तानने निर्धारित 20 ओव्हर्स मध्ये 175/6 धावा केल्या.
श्रीलंकेची दमदार सुरुवात
श्रीलंकेने या लक्ष्याचा पाठलाग करताना जोरदार सुरुवात केली. पाथुम निसंका (35) आणि कुसल मेंडिस ही ओपनिंग जोडी मैदानात उतरली होती. त्यांनी पावरप्लेच्या षटकात 57 धावा फटकावल्या. सातव्या ओव्हर मध्ये श्रीलंकेला पहिला झटका बसला. गोलंदाज नवीन उल हकने मेंडिसला 36 धावांवर आऊट केलं. पुढच्या पाच षटकात मुजीब उर रहमानच्या मदतीने अफगाणिस्तानने धावगतीला लगाम घातला. श्रीलंकेचे आणखी दोन विकेट काढले.
राजपक्षामुळे अफगाणिस्तानचा पराभव
अखेरच्या 35 चेंडूत श्रीलंकेला विजयासाठी 57 धावांची आवश्यकता होती. दानुष्का गणतिलकाने 20 चेंडूत 33 धावा आणि भानुका राजपक्षाने 14 चेंडूत 31 धावा फटकावल्या. त्यांनी अफगाणिस्तानच्या गोलंदाजीवर प्रतिहल्ला चढवला. दोघांनी 15 चेंडूत 32 धावा फटकावल्या. राजपक्षाने जास्त आक्रमक फलंदाजी केली. वानिंदु हसारंगाने 9 चेंडूत 16 धावा फटकावल्या. राजपक्षा सोबत मिळून त्याने संघाला विजयापर्यंत पोहोचवलं. 20 व्या ओव्हरच्या पहिल्या चेंडूवर चामिका करुणारत्नेने चौकार मारला. श्रीलंकेने अशा प्रकारे सुपर 4 मध्ये पहिल्या विजयाची नोंद केली. श्रीलंकेने अफगाणिस्तान बरोबर ग्रुप स्टेज मधील पराभवाचा हिशोब चुकता केला.
