World Cup 2023 : अफगाणिस्तान पहिल्यांदाच उपांत्य फेरीत धडक मारणार? समजून घ्या सोप्या पद्धतीने

मुंबई : वनडे वर्ल्डकप स्पर्धेतील उपांत्य फेरीत भारत आणि दक्षिण अफ्रिकेने धडक मारली आहे. आता उपांत्य फेरीच्या दोन स्थानासाठी चार संघांमध्ये चुरस आहे. ऑस्ट्रेलिया, न्यूझीलंड, पाकिस्तान आणि अफगाणिस्तान या संघांना उपांत्य फेरीची दारं खुली आहेत. त्यामुळे या चार पैकी कोणते दोन संघ उपांत्य फेरीत जागा मिळवतात हे पाहणं औत्सुक्याचं ठरणार आहे. दिग्गज संघांच्या रेसमध्ये अफगाणिस्तान असल्याने उपांत्य फेरी गाठणार का? असा प्रश्नही क्रीडाप्रेमींना पडला आहे. गुणतालिकेत अफगाणिस्तानचा संघ 8 गुण आणि -0.330 नेटरनरेटसह सहाव्या स्थानावर आहे. पण दोन सामने शिल्लक असल्याने प्लस पॉइंट आहे. त्यात अफगाणिस्तानने कमी लेखून चालणार आहे. इंग्लंड, पाकिस्तान आणि श्रीलंकेसारख्या दिग्गज संघांना पराभवाचं पाणी पाजलं आहे. त्यामुळे उपांत्य फेरीत अफगाणिस्तानने धडक मारली तर आश्चर्य वाटायला नको..चला जाणून घेऊयात अपगाणिस्तान उपांत्य फेरी कशी गाठणार ते..

अफगाणिस्तान आणि उपांत्य फेरीचं गणित

• अफगाणिस्तानचे साखळी फेरीतील दोन सामने ऑस्ट्रेलिया आणि दक्षिण अफ्रिकेविरुद्ध आहे. अफगाणिस्तानने या दोन्ही सामन्यात विजय मिळवला तर उपांत्य फेरी गाठणं शक्य आहे. अफगाणिस्तानला लिंबू टिंबू समजणं चांगलंच महागात पडू शकतं.
• ऑस्ट्रेलियाने उर्वरित दोन्ही सामने गमावले तर अफगाणिस्तानला संधी आहे. अफगाणिस्तान तिसरं किंवा चौथं स्थान गाठू शकते. पण ऑस्ट्रेलियाने अफगाणिस्तानला पराभूत केलं तर चौथ्या स्थानासाठी चुरस निर्माण होईल.
• अफगाणिस्तानचा साखळी फेरीतील शेवटचा सामना दक्षिण अफ्रिकेशी होणार आहे. या सामन्यात जर मोठा उलटफेर झाला तर मात्र कठीण होईल. कारण दक्षिण अफ्रिकेने उपांत्य फेरी गाठली आहे. मात्र शर्यतीतील तीन संघांना जबर धक्क बसेल.
• अफगाणिस्तानने दोन पैकी एक जरी सामना गमवला तर पाकिस्तान आणि न्यूझीलंडच्या पराभवासाठी साकडं घालावं लागेलं.

अफगाणिस्तानने सुरुवातीचे दोन सामने गमवल्यानंतर जबरदस्त कमबॅक केलं. पहिल्या सामन्यात बांगलादेशने 6 गडी राखून पराभूत केलं. दुसऱ्या सामन्यात भारताने 8 गडी राखून विजय मिळवला. तिसऱ्या सामन्यात अफगाणिस्तानने मोठा उलटफेर केला आणि इंग्लंडला 69 धावांनी पराभूत केलं. त्यानंतर न्यूझीलंडकडून 149 धावांनी पराभव सहन करावा लागला.

पाचव्या सामन्यात अफगाणिस्तानने पाकिस्तानला 8 विकेट आणि 6 चेंडू राखून पराभूत केलं. त्यानंतर श्रीलंकेला 7 गडी आणि 28 चेंडू राखून पराभवाची धूळ चारली. नेदरलँडचा 7 गडी राखून पराभव केला. आता अफगाणिस्तानचा सामना ऑस्ट्रेलियाशी होणार आहे.

अफगाणिस्तानचे सामने

• 7 नोव्हेंबर 2023 ऑस्ट्रेलिया विरुद्ध अफगाणिस्तान
• 10 नोव्हेंबर 2023 दक्षिण अफ्रिका विरुद्ध अफगाणिस्तान