WPL 2024, DC vs UPW : युपी वॉरियर्सने नाणेफेक जिंकत निवडली फलंदाजी, अशी असेल प्लेइंग इलेव्हन

मुंबई : वुमन्स प्रीमियर लीग स्पर्धेत दिल्ली कॅपिटल्स आणि युपी वॉरियर्स यांच्यात सामना होत आहे. एक दिवस आधीच युपी वॉरियर्सला मुंबई इंडियन्सकडून पराभवाचं तोंड पाहावं लागलं होतं. त्या धक्क्यातून सावरत नाही तोच दिल्लीचं आव्हान आहे. त्यामुळे आता मागचं सारं काही विसरून पुन्हा एकदा जोमाने उभं राहावं लागणार आहे. युपी वॉरियर्सने मध्यंतरी चांगली सुरुवात केली होती. पण पुन्हा एकदा गाडी रुळावरून घसरली आहे. त्यामुळे टॉप थ्रीमध्ये स्थान मिळवण्याचं मोठं आव्हान असणार आहे. तर दिल्लीने आजचा सामना जिंकला तर टॉप थ्रीमधील स्थान जवळपास पक्कं होणार आहे. दरम्यान नाणेफेकीचा कौल युपी वॉरियर्सच्या बाजूने लागला. दिल्लीत वातावरणात प्रथम फलंदाजी मानवत असल्याचं दिसून आलं आहे. त्यामुळे बंगळुरुत प्रथम गोलंदाजी आणि दिल्लीत प्रथम फलंदाजी असा ट्रेंड सुरु झाला आहे. त्यानुसार युपी वॉरियर्सने प्रथम फलंदाजी निवडली आहे. आता दिल्लीसमोर मोठं आव्हान ठेवण्यासाठी धडपड असणार आहे.

नाणेफेकीचा कौल जिंकल्यानंतर एलिसा हिलीने सांगितलं की, “आज आम्ही प्रथम फलंदाजी करणार आहोत. काल रात्री या विकेटवर खेळलो, आशा आहे की आम्ही त्यातून धडा घेऊ. आम्हाला माहीत आहे की आम्हाला शेवटचे दोन सामने जिंकायचे आहेत. आम्ही दिल्लीला हरवलेले नाही. संघात दोन बदल केले आहेत.”

दिल्लीची कर्णधार मेग लॅनिंगने सांगितलं की, “आम्हाला माहित आहे की प्रत्येक संघ जिंकण्यास सक्षम आहे. आम्हाला आज चांगले खेळायचे आहे, आमच्यासाठी एक चांगले आव्हान आहे.खेळपट्टी वाजवीपणे ठीक दिसत होती, वेगवान आउटफिल्ड आहे. संघात एक बदल केला आहे.”

दोन्ही संघांची प्लेइंग इलेव्हन

यूपी वॉरियर्स (प्लेइंग इलेव्हन): ॲलिसा हिली (विकेटकीपर/कर्णधार), किरण नवगिरे, ताहलिया मॅकग्रा, ग्रेस हॅरिस, श्वेता सेहरावत, दीप्ती शर्मा, पूनम खेमनार, सोफी एक्लेस्टोन, उमा चेत्री, गौहर सुलताना, सायमा ठाकोर.

दिल्ली कॅपिटल्स महिला (प्लेइंग इलेव्हन): मेग लॅनिंग (कर्णधार), शफाली वर्मा, ॲलिस कॅप्सी, जेमिमाह रॉड्रिग्स, ॲनाबेल सदरलँड, जेस जोनासेन, अरुंधती रेड्डी, राधा यादव, तानिया भाटिया (विकेटकीपर), शिखा पांडे, तितास साधू