Government Scheme : व्हा सावध, नाहीतर गंडाल, आता या सरकारी योजनेच फुटले पेव..तुम्हाला खरंच मिळणार का 3400 रुपयांचा भत्ता?

तर बसेल फटका

Image Credit source: सोशल मीडिया

नवी दिल्ली : तुम्हाला पुन्हा एकदा बेरोजगारी भत्त्याचा (Unemployment Allowance) अथवा आशा आशयाचा मॅसेज (Message) आला आहे का? तर सावध रहा. मोदी सरकार तरुणांना दरमहा 3400 रुपये देणार असल्याची नवी थाप या मॅसेजमध्ये मारण्यात आली आहे. एका क्लिकवर तुम्हाला अर्ज (Form Registration) भरुन या योजनेचा लाभ घेता येईल असा दावा करण्यात येतो आणि नेमकी येथेच तुमची चूक होते. त्याचा तुम्हाला मोठा फटका बसतो. तेव्हा रहा सावध, होऊ नका सावज..

PIB Fact Check मध्ये हा मॅसेज बोगस असल्याचे दिसून आले आहे. पंतप्रधान ज्ञानवीर योजनेच्या नावाखाली हा गंडा घालण्यात येत आहे. तरुणांना 3400 रुपये देण्यात येत असल्याचा हा मॅसेज समाज माध्यमांवर व्हायरल झाला आहे. या मॅसेजला बळी न पडण्याचे आवाहन करण्यात आले आहे.

एवढेच नाही तर असे मॅसेज खात्री न करता पुढे न पाठविण्याचे आवाहन ही पत्र सूचना कार्यालयाने (PIB) केले आहे. या मॅसेजमध्ये तरुणांना दर महा केंद्र सरकार 3400 रुपये भत्ता देत असल्याचा दावा करण्यात आला आहे.

पंतप्रधान ज्ञानवीर योजनेसाठी नोंदणी सुरु आहे. या योजनेतंर्गत युवकांना दरमहा 3400 रुपये भत्ता देण्यात येत असल्याचा दावा करण्यात आला आहे. तसेच नोंदणीसाठी शेअर लिंकवर क्लिक करण्याचे आवाहन करण्यात आले आहे.

केंद्र सरकार अनेक सरकारी योजना राबविते. त्याचा प्रसार आणि प्रचार ही करते. या सरकारी योजनांची माहिती संबंधित विभाग वा त्यांचे मंत्रालय विविध माध्यमातून देते. सरकारी कार्यालयांकडून अधिकृतरित्या ही माहिती देण्यात येत असते.

बोगस मॅसेजवर करण्यात आलेल्या दाव्यावर विश्वास न ठेवण्याचे आवाहन करण्यात आले आहे. डोळे झाकून अशा मॅसेजवर विश्वास ठेवू नका, कुठलाही वैयक्तिक तपशील, बँक खात्याचा तपशील शेअर न करण्याचे आवाहन पीआयबीने केले आहे.

तुम्ही खासगी तपशील सामायिक, शेअर केला तर त्याचा तुम्हाला नाहक मनस्ताप होऊ शकतो. कारण ही योजनाच बोगस आहे. पण तुमची माहिती ऑनलाईन फ्रॉर्ड करणाऱ्यांच्या हाती लागू शकते.