शिवप्रेमींचा उत्साह शिगेला, वाघनखं भारतात आणण्याचा करार आज होणार अन्…

मुंबई, ३ ऑक्टोबर २०२३ | देशभरातील शिवप्रेमींचा उत्साह आता शिगेला पोहोचला असताना लंडनमधून वाघनखं भारतात आणण्यासाठी आज करार करण्यात येणार असल्याची माहिती समोर येत आहे. आज रात्री साडे आठ वाजता हा करार होणार आहे. या कराराची प्रक्रिया पूर्ण झाल्यानंतर १६ नोव्हेंबर रोजी शिवकालीन वाघनखं भारतात आणण्यात येणार आहेत. अफजलखानाला संपवण्यासाठी जी वाघनखं छत्रपती शिवरायांनी वापरलेली वाघनखं लवकरच भारतात परत आणण्यात येणार आहे. येत्या १६ नोव्हेंबरला शिवरायांची वाघनखं मुंबईत आणण्यात येणार असून ती तीन वर्षांसाठी भारतात असणार आहे. त्यामुळे अवघ्या शिवप्रेमींचं लक्ष वाघनखं भारतात दाखल होण्याच्या दिवसाकडे लागून राहिले आहे. दरम्यान, छत्रपती शिवाजी महाराज यांच्या वाघनखांवरून सध्या राजकारणात चांगलेच आरोप-प्रत्यारोप होत असल्याचे पाहायला मिळत आहे.