Bandra terminus Stampede : मुंबईतील वांद्रे टर्मिनसच्या फलाट क्रमांक एकवर चेंगराचेंगरी, नेमकं काय घडलं?
वांद्रे टर्मिन्सवर चेंगराचेंगरी झाली. या चेंगराचेंगरीत 9 प्रवाशी जखमी झाले असून या दुर्घटनेत जखमी झालेल्या प्रवाशांना भाभा रुग्णालयात दाखल करण्यात आले आहे. त्यातील दोघांची प्रकृती चिंताजनक आहे.
मुंबईतील वांद्रे टर्मिनसच्या फलाट क्रमांक एकवर चेंगराचेंगरी झाल्याची माहिती समोर येत आहे. मुंबईच्या उपनगरीय रेल्वे मार्गावरील प्रमुख स्थानकांपैकी एक असलेल्या वांद्रे टर्मिनसवरून सुटणारी वांद्रे-गोरखपूर एक्स्प्रेस पकडताना चेंगराचेंगरी झाल्याची घटना आज सकाळी घडली. एक्स्प्रेस पकडताना झालेल्या चेंगराचेंगरीच्या घटनेत 9 जण जखमी झाले आहेत. तर दोघांची प्रकृती अत्यंत गंभीर असल्याचे सांगितले जात आहे. या दुर्घटनेत जखमी झालेल्यांना भाभा रुग्णालयात दाखल करण्यात आले असून त्यांच्यावर उपचार सुरू आहे. छट पूजेसाठी उत्तरप्रदेशला निघालेल्या प्रवाशांची एकच गर्दी झाली आणि चेंगराचेंगरीमुळे ही घटना घडली. मुंबई महापालिकेकडून मिळालेल्या माहितीनुसार, आज सकाळी 5.56 वाजता वांद्रे टर्मिन्सच्या फलाट क्रमांक एकवर चेंगराचेंगरी झाली. वांद्रे टर्मिन्सवर प्लॅटफॉर्म क्रमांक एकवर 22921 वांद्रे गोरखपूर एक्सप्रेस ही लागलेली होती. या ट्रेनमध्ये चढण्यासाठी मोठ्या प्रमाणात प्रवाशांची गर्दी झाली होती. यावेळी ट्रेनमध्ये चढत असताना मोठ्या प्रमाणावर चेंगराचेंगरी झाली आहे. या घटनेत जखमी झालेले प्रवाशी साधारण 18 ते 30 वयोगटातील असून यामध्ये इंद्रजित सहानी आणि नूर मोहम्मद शेख यांची प्रकृती गंभीर आहे.
