विधानसभा निवडणुकीला माणूस आमचा अन् निशाण तुमचं? गटबाजीविरोधीत नेमका प्लॅन काय?

उमेदवार भाजपचा पण चिन्ह अजित पवार यांच्या राष्ट्रवादीच्या घड्याळाचं, उमेदवार एकनाथ शिंदे यांच्या शिवसेनेचा आणि चिन्ह भाजपच्या कमळाचं, उमेदवार शरद पवारांचा तर चिन्ह ठाकरेंच्या मशालीचं, उमेदवार उद्धव ठाकरेंचा पण चिन्ह शरद पवार यांच्या राष्ट्रवादी पक्षाचं म्हणजेच तुतारीचं… असं चित्र येत्या विधानसभा निवडणुकीत अनेक मतदारसंघात दिसण्याची शक्यता आहे. एकमेकांची मत ट्रान्सफर व्हावी, सक्षम उमेदवार मिळावा आणि जागा न सुटल्याने युती आघाडीमध्ये निर्माण होणारा तणाव निवळावा म्हणून नव-नव्या शकली लढवल्या जाता आहेत. नाराजी दूर होऊन ग्राऊंड लेव्हलवर कार्यकर्त्यांनी एकजूटीनं राहावं म्हणून विधानसभेला माणूस आमचा, निशाण तुमचं? या जुगाडाची चाचपणी सुरू आहे. सांगलीच्या इस्लामपुरात शरद पवार गटाचे जयंत पाटील आमदार आहेत. पंरपरेने ही जागा राष्ट्रवादी विरूद्ध भाजप अशी आहे. अखंड राष्ट्रवादीचा येथे होल्ड असला तरी जयंत पाटील शरद पवार गटात असल्याने अजित पवार गटाकडे येथे तुल्यबळ उमेदवार नाही. तर भाजप जागा लढवत असली तरी तुल्यबळ इतकं संघटन नाही. त्यामुळे जयंत पाटील यांच्या विरोधात भाजपच्या निशिकांत पाटलांना तिकीट मिळणार आहे. पण ते अजित पवार यांच्या घड्याळ या चिन्हावर लढण्याची शक्यता आहे.