मुख्यमंत्री पदाचा चेहरा कोण? मंत्री गिरीश महाजन यांनी थेट नावच घेतलं

राज्यातील राजकीय वर्तुळात पुढचा राज्यातील मुख्यमंत्री कोण होणार? मुख्यमंत्रीपदाचा चेहरा कोण? याची चांगलीच चर्चा रंगतेय. अशातच भाजप नेते, मंत्री गिरीश महाजन यांनी राज्यात मुख्यमंत्री पदाचा चेहरा कोण असणार यावर भाष्य केले आहे. ‘भाजपात मुख्यमंत्रीपदाचा चेहरा एकच आहे तो म्हणजे देवेंद्र फडणवीस यांचा… भाजपचा मुख्यमंत्रीपदाचा चेहरा कोणी असेल तर तो देवेंद्र फडणवीस आहेत. यासंदर्भातील सगळे निर्णय पक्षश्रेष्ठी घेतील त्याचे अधिकार आम्हाला नाहीत. पण आमच्या मनातील मुख्यमंत्री कोणी असेल तर ते देवेंद्र फडणवीस आहेत.’, असे स्पष्टपणे गिरीश महाजन यांनी सांगितले. दरम्यान, महामंडळ वाटपात शिंदे यांच्या गटाला प्राधान्य दिले गेले आहे. याबद्दल ते म्हणाले की हा विषय पक्षश्रेष्ठी बघतात मला वाटतं देवेंद्रजींना हा विषय माहीत असेल. भरत गोगावले यांना संधी मिळालेली नाही. याबाबत ते म्हणाले की बरोबर आहे, येत्या पंधरा – वीस दिवसात आचारसंहिता लागणार आहे मंत्रीपद मिळून करणार काय, पुढच्या मंत्रिमंडळात ते पहिल्यांदा शपथविधी घेतील असेही गिरीश महाजन यांनी म्हटले आहे.