ब्रेकिंगः मुंबईत फॅशन स्ट्रीट भागात आगीचा भडका, फायर ब्रिगेडच्या गाड्या घटनास्थळी!
मुंबईत दुपारी बारा वाजेच्या सुमारास ही घटना घडली
मुंबईः मुंबईतील महत्त्वाचा आणि अत्यंत गजबजलेला परिसर असेलल्या फॅशन स्ट्रीट (Fashion Street) भागात आग लागल्याची घटना (Mumbai Fire) घडली आहे. दुपारी 12 वाजेच्या सुमारास परिसरातील कपड्यांच्या दुकानाला आग लागली. एकाला लागून एक दुकानं असल्याने दुकानांतील कपड्यांनी काही क्षणात पेट घेतला. ही आग विझवण्यासाठी अग्निशमन दलाच्या (Fire Brigade) गाड्या घटनास्थळी तत्काळ दाखल झाल्या.
फॅशन स्ट्रीट भाग हा अत्यंत वर्दळीचा असल्याने आग लागल्यामुळे इथे दुपारच्या वेळी एकच गोंधळ उडाला. स्थानिक प्रशासनाच्या मदतीने हा परिसर तत्काळ निर्मनुष्य करण्यात आला. त्यामुळे आगीत जीवित हानी झाल्याची माहिती समोर आलेली नाही.
मात्र कपड्यांच्या दुकानांचं मोठं नुकसान झालंय. जवळपास 8 ते 10 कपड्यांच्या दुकानांतील सगळा माल आगीत जळून खाक झाला आहे.
अग्निशमक दलाच्या ६ गाड्या घटनास्थळी रवाना झाल्या. पाण्याच्या फवाऱ्यांद्वारे आग विझवण्याचे प्रयत्न केले जात आहेत.