पकडले जाण्याच्या भीतीने पाईपवरुन उतरणं अंगलट, डोंबिवलीत बिल्डिंगमधून पडून चोराचा मृत्यू
सुरक्षारक्षकाने त्यांचा पाठलाग करत त्या दोघांना पकडण्याचा प्रयत्न केला. मात्र पकडले जाण्याच्या भीतीने या दोघांनी इमारतीच्या डक्टमधील पाईपला पकडून खाली उतरायला सुरुवात केली. या प्रयत्नात मोहम्मद आणि अरफान हे दोघेही खाली कोसळले.
डोंबिवली : पकडले जाण्याच्या भीतीने पाईपला पकडून बिल्डिंगमधून खाली उतरायचा प्रयत्न करणं चोराच्या जीवावर बेतलं. इमारतीवरुन खाली पडून चोरट्याचा मृत्यू (Thief Death) झाल्याची घटना उघडकीस आली आहे. ठाणे जिल्ह्यातील डोंबिवली शहरात (Thane Dombivali Crime News) हा धक्कादायक प्रकार समोर आला आहे. सुरक्षारक्षकाने पाठलाग केल्यानंतर घाबरलेले दोघे चोर डक्टमधील पाईपला धरुन खाली उतरण्याचा प्रयत्न करत होते, मात्र या नादात खाली पडून चोर (Theft) गंभीर जखमी झाला होता. या घटनेनंतर पोलिसांनी मृत तरुणासह त्याच्या साथीदारावर चोरीच्या प्रयत्नाचा गुन्हा दाखल केला. मयत तरुण हा सराईत गुन्हेगार असल्याची माहिती पोलिसांनी दिली आहे.
काय आहे प्रकरण?
डोंबिवलीच्या खंबाळपाडा परिसरात केडीएमसीने बीएसयूपी योजनेअंतर्गत शहरी गरिबांसाठी इमारती उभारल्या आहेत. या इमारतींमधील सदनिकांचा अद्याप लाभार्थ्यांना ताबा देण्यात आलेला नसल्यामुळे या इमारती रिकाम्या पडून आहेत. याचाच फायदा घेत गेल्या काही दिवसांपासून भुरट्या चोरट्यांनी या इमारतींकडे मोर्चा वळवला आहे.
भुरट्या चोरांचा सुळसुळाट
या इमारतींमधल्या घरात जाऊन तिथले दरवाजे, ग्रील, नळ, वायरिंग चोरटे चोरून नेतात. त्यामुळे या इमारतींबाहेर सुरक्षारक्षक नेमण्यात आला आहे. मात्र या सुरक्षारक्षकाची नजर चुकवून सोमवारी रात्री मोहम्मद सलीम भाटकर आणि अरफान पिंजारी हे दोन चोरटे चोरी करण्यासाठी इमारतीत घुसले.
डक्टमधील पाईपवरुन खाली उतरायला सुरुवात
ही बाब सुरक्षारक्षकाच्या लक्षात येताच सुरक्षारक्षकाने त्यांचा पाठलाग करत त्या दोघांना पकडण्याचा प्रयत्न केला. मात्र पकडले जाण्याच्या भीतीने या दोघांनी इमारतीच्या डक्टमधील पाईपला पकडून खाली उतरायला सुरुवात केली. या प्रयत्नात मोहम्मद आणि अरफान हे दोघेही खाली कोसळले.
दोघांवर चोरीच्या प्रयत्नांचा गुन्हा
यापैकी मोहम्मद भाटकर या चोरट्याचा मृत्यू झाला. तर अरफान पिंजारी हा चोरटा जखमी झाला. या घटनेनंतर टिळकनगर पोलिसांनी या दोघांच्या विरोधात चोरी करण्याचा प्रयत्न केल्याचा गुन्हा दाखल केला आहे. यातील मृत मोहम्मद सलीम भाटकर हा सराईत गुन्हेगार असल्याची माहिती डोंबिवलीचे सहाय्यक पोलीस आयुक्त जे. डी. मोरे यांनी दिली आहे
