Pune Crime : तक्रार मागे घेण्यासाठी महिलेला संपवण्याचा प्रयत्न, धक्कादायक घटनेने पुणे हादरले !
पुण्यातील मुंढवा भीमनगरमधील म्हाडा कॉलनीत हा धक्कादायक प्रकार घडला आहे. घटनेनंतर आरोपी फरार झाला आहे. याप्रकरणी पुण्यातील मुंढवा पोलिसात गुन्हा दाखल करण्यात आला आहे.
पुणे : बलात्काराची तक्रार मागे घेण्यासाठी पीडित महिलेला पेट्रोल टाकून जाळण्याचा प्रयत्न केल्याची खळबळजनक घटना पुण्यात उघडकीस आली आहे. पुण्यातील मुंढवा भीमनगरमधील म्हाडा कॉलनीत हा धक्कादायक प्रकार घडला आहे. घटनेनंतर आरोपी फरार झाला आहे. याप्रकरणी पुण्यातील मुंढवा पोलिसात गुन्हा दाखल करण्यात आला आहे. मुंढवा पोलीस आरोपीचा शोध घेत आहेत. रमजान खलील पटेल असे आरोपीचे नाव आहे. दिवसाढवळ्या घडलेल्या या घटनेमुळे पुणे शहरात एकच खळबळ माजली आहे. तसेच महिलांच्या सुरक्षेचा प्रश्नही ऐरणीवर आला आहे.
2018 मध्ये घडली होती बलात्काराची घटना
आरोपी रमजान पटेल याने 2018 मध्ये पीडित महिलेवर बलात्कार केला होता. याप्रकरणी सोलापूर जिल्ह्यातील पांगरी पोलीस ठाण्यात पीडित महिलेने रमजान विरोधात बलात्काराची तक्रार दाखल केली होती.
आरोपीने तक्रार मागे घेण्यासाठी महिलेकडे तगादा लावला होता
ही तक्रार मागे घेण्यासाठी आरोपीने गेल्या अनेक दिवसांपासून पीडित महिलेच्या मागे तगादा लावला होता. मात्र महिला तक्रार मागे घ्यायला तयार नव्हती. याच कारणातून आरोपीने दाखल केलेली बलात्काराची तक्रार मागे घे म्हणत पीडितेच्या अंगावर पेट्रोल टाकून पेटवून देण्याचा प्रयत्न केला.
मुंढवा पोलिसांकडून आरोपीचा शोध सुरु
याप्रकरणी आरोपीवर पुण्यातील मुंढवा पोलिसात गुन्हा दाखल करण्यात आला असून, पोलिसांकडून आरोपीचा शोध सुरू आहे. दिवसाढवळ्या घडलेल्या या घटनेवरुन कायदा आणि सुव्यवस्थेचा प्रश्न पुन्हा एकदा ऐरणीवर आला आहे. गुन्हेगारांना पोलिसांचा धाकच राहिला नसल्याचे यावरुन दिसून येते.
