‘भाईचा बड्डे, वाजले बारा’, पुण्यात गुन्हेगाराच्या वाढदिवसाचा भर रस्त्यात केक कापणाऱ्या तरुणांची धिंड

अभिजीत पोते, Tv9 मराठी, पुणे | 12 जानेवारी 2024 : येरवडा तुरुंगात शिक्षा भोगणाऱ्या गुन्हेगाराचा वाढदिवस साजरा करण्यात अल्याचा प्रकार नुकताच समोर आलाय. पण गुन्हेराच्या वाढदिवसाचा भर रस्स्त्यात केक कापणाऱ्या तरुणांना पोलिसांनी चांगलीच अद्दल घडवली आहे. पुणे पोलिसांनी या आरोपींची थेट धिंडच काढली. त्यामुळे या प्रकरणाची पुण्यात सध्या जोरदार चर्चा सुरु आहे. पुण्याच्या जनवाडी परिसरात रात्री बारा वाजता काही तरुणांनी गुन्हेगाराचा वाढदिवस साजरा केला होता. विशेष म्हणजे तरुणांनी ज्या गुन्हेगाराच्या वाढदिवसाचा केक भर रस्त्यात कापला होता त्याला पोलिसांनी मोक्काच्या गुन्ह्याअंतर्गत अटक केली होती. या प्रकरणी पोलिसांनी माहिती मिळताच आरोपींना चांगलीच अद्दल घडवली.

मोक्काच्या गुन्ह्यात अटक झालेल्या आरोपीचा भर रस्त्यात केक कापणाऱ्या तरुणांना पोलिसांनी शोधून काढलं. त्यानंतर या तरुणांची भर पुणे शहरात धिंड काढण्यात आली. विशेष म्हणजे या मुलांनी येरवडा जेलची प्रतिकृती असलेला केक आणला होता. त्यावर गुन्हेगाराचा फोटो आणि येरवडा कारागृहाचा फोटो होता. गुन्हेगाराचे चाहते असलेल्या या तरुणांनी भर रस्ता अडवून, दुचाक्या उभ्या करून, तुरुंगात असलेल्या भाईचा वाढदिवस साजरा केला होता. विशेष म्हणजे या तरुणांनी केक तलवारीने कापला होता.

पोलिसांनी तरुणांना धडा शिकवला

तरुणांनी गुन्हेगाराच्या वाढदिवसाचा केक कापण्याचा प्रसंग मोबाईलच्या कॅमेऱ्यातही कैद केला होता. त्यांनी हा व्हिडीओ सोशल मीडियावरही शेअर केला होता. हा व्हिडीओ चांगलाच व्हायरल झाला. त्यामुळे पोलिसांपर्यंत हा व्हिडीओ पोहोचला. पोलिसांनी हा व्हिडीओ पाहताच त्यातील तरुणांना शोधून काढलं. पोलिसांनी सर्व तरुणांना अटक केली. त्यानंतर त्यांनी जिथे केक कापला अगदी त्याच परिसरातून आरोपींची धिंड काढली. यावेळी आरोपी तरुणांनी मान खाली घातली होती. पुणे पोलिसांकडून आरोपींची धिंड काढण्याची ही स्टाईल तशी जुनीच आहे. पोलिसांनी अशाप्रकारे अनेक आरोपींना धडा शिकवण्याचा प्रयत्न केला आहे.

पुण्यात गुन्हेगारी कमी होईना

दरम्यान, पुण्यात गुन्हेगारी काही केल्या कमी होताना दिसत नाही. नुकतंच पुण्यात गुंड शरद मोहोळची हत्या करण्यात आल्याची घटना घडली आहे. पुणे पोलिसांनी या प्रकरणातील मारेकऱ्यांना शोधून काढलं आहे. पोलिसांना या प्रकरणी तपासातून नवी माहिती देखील मिळत आहे. पोलीस या प्रकरणाचा सखोल तपास करत आहेत. पण या प्रकरणामुळे पुण्यातील भीषण गुन्हेगारीचं वास्तव समोर आलं आहे.