अत्यंत अश्लील, असभ्य.. म्हणत ’12th फेल’मधल्या विकास दिव्यकिर्ती यांनी ‘ॲनिमल’ला झापलं
संदीप रेड्डी वांगा दिग्दर्शित ‘ॲनिमल’ या चित्रपटाने केवळ बॉक्स ऑफिसवर दमदार कमाईच केली नाही तर सोशल मीडियावरही हा चित्रपट चर्चेचा विषय ठरला. या चित्रपटातील सीन्स आणि डायलॉग्सवरून सोशल मीडियावर विविध मतमतांतरे मांडली गेली.
शिक्षक आणि नागरी सेवक विकास दिव्यकिर्ती हे ’12th फेल’ या चित्रपटानंतर अधिक प्रकाशझोतात आले. त्यांच्या शिकवणीचे अनेक व्हिडीओ सोशल मीडियावर व्हायरल होत असतात. त्यांच्या विचारांनी तरुणाई विशेष प्रभावित आहे. नुकत्याच दिलेल्या एका मुलाखतीत त्यांनी अभिनेता रणबीर कपूरच्या ‘ॲनिमल’ चित्रपटावर बरीच टीका केली. हा चित्रपट बनायलाच पाहिजे नव्हता, असं मत त्यांनी मांडलं. इतकंच नव्हे तर त्यांनी ‘ॲनिमल’ला ‘अश्लील आणि असभ्य’ म्हटलंय. “ॲनिमलसारखा चित्रपट आपल्या समाजाला दहा वर्षे मागे घेऊन जातो. असा चित्रपट बनायलाच पाहिजे नव्हता. तुम्ही पैसे कमावलात. तुमचा हिरो ॲनिमल म्हणजे प्राण्यासारखाच वागतो असं तुम्ही दाखवलंत. पण यात कुठेतरी सामाजिक मूल्यांचा विचार करायला पाहिजे होता. लोक फक्त आर्थिक फायद्यासाठीच काम करतायत का”, असा सवाल विकास यांनी केला.
निलेश मिश्रा यांच्या मुलाखतीत विकास यांनी ‘ॲनिमल’ चित्रपटातील तृप्ती डिमरीच्या एका वादग्रस्त सीनवरही प्रतिक्रिया दिली. चित्रपटात तृप्तीने रणबीरच्या प्रेयसीची भूमिका साकारली. त्यात तो तिला त्याचे शूज चाटण्यास सांगतो. या सीनवरून बराच वाद निर्माण झाला होता. त्याविषयी बोलताना विकास म्हणाले, “हा चित्रपट पाहिल्यानंतर, सरंजामशाही मानसिकतेचा आणि बालिश स्वभावाचा एखादा मुलगा त्याच्या गर्लफ्रेंडच्या प्रेमाची परीक्षा घेण्यासाठी त्याचे शूज चाटण्यास सांगितलं तर काय कराल? जर आपण इतका अश्लील आणि असभ्य चित्रपट बनवत असू तर ही अत्यंत निराशाजनक बाब आहे.”
विकास दिव्यकिर्ती हे आयएएस कोचिंग इन्स्टिट्यूटचे संस्थापक म्हणून ओळखले जातात. विधू विनोद चोप्रा दिग्दर्शित ’12th फेल’ या चित्रपटात त्यांनी कोचिंग इन्स्टिट्यूटच्या संस्थापकाचीच भूमिका साकारली होती. विधू विनोद चोप्रा यांनी त्यांना त्यांना चित्रपटाच्या लेखकांपैकी एक म्हणूनही श्रेय दिलंय. संदीप रेड्डी वांगा दिग्दर्शित ‘ॲनिमल’ या चित्रपटाने जगभरात तब्बल 900 कोटी रुपयांची कमाई केली होती.
संदीप रेड्डी वांगा दिग्दर्शित ‘ॲनिमल’ या चित्रपटाने केवळ बॉक्स ऑफिसवर दमदार कमाईच केली नाही तर सोशल मीडियावरही हा चित्रपट चर्चेचा विषय ठरला. या चित्रपटातील सीन्स आणि डायलॉग्सवरून सोशल मीडियावर विविध मतमतांतरे मांडली गेली. चित्रपटातील रणबीर कपूर आणि रश्मिका मंदाना यांच्यातील केमिस्ट्रीने तर सर्वांचं लक्ष वेधलंच. पण त्याचसोबत अभिनेत्री तृप्ती डिमरीच्या भूमिकेची एक वेगळीच क्रेझ पहायला मिळाली. ‘ॲनिमल’मध्ये रणबीरसोबत तृप्तीने न्यूड आणि इंटिमेट सीन्स दिले आहेत. याच सीन्समुळे ती प्रकाशझोतात आली.
