Aamir Ali | “घटस्फोटानंतर आयुष्याचा सर्वोत्तम काळ सुरू”; अभिनेत्याच्या वक्तव्याची चर्चा
एका मुलाखतीत त्याने घटस्फोटानंतर संजीदाशी कोणताच संपर्क नसल्याचं स्पष्ट केलं होतं. आमिर आणि संजीदाने बरीच वर्षे एकमेकांना डेट केल्यानंतर 2012 मध्ये लग्न केलं होतं. 2021 मध्ये या दोघांच्या घटस्फोटाची प्रक्रिया पूर्ण झाली आणि त्यानंतर मुलीचं पालकत्व संजीदाला मिळालं.
मुंबई : टेलिव्हिजनवरील लोकप्रिय जोड्यांमध्ये अभिनेता आमिर अली आणि संजीदा शेख यांचा आवर्जून समावेश होतो. मात्र ज्यावेळी या जोडीने विभक्त होत असल्याचं जाहीर केलं, तेव्हा चाहत्यांना मोठा धक्काच बसला. विशेष म्हणजे घटस्फोटानंतर दोन वर्षांपर्यंत दोघांनी कोणतीच प्रतिक्रिया दिली नव्हती. आता नुकत्याच दिलेल्या एका मुलाखतीत जेव्हा आमिरला घटस्फोटानंतरच्या आयुष्याबद्दल प्रश्न विचारण्यात आला, तेव्हा त्याचं ऐकून चाहते अवाक् झाले. आमिर आणि संजीदाने बरीच वर्षे एकमेकांना डेट केल्यानंतर 2012 मध्ये लग्न केलं होतं. मात्र लग्नाच्या आठ वर्षांनंतर त्यांनी घटस्फोट घेतला. 2021 मध्ये या दोघांच्या घटस्फोटाची प्रक्रिया पूर्ण झाली आणि त्यानंतर मुलीचं पालकत्व संजीदाला मिळालं.
आमिर अली सध्या त्याच्या आगामी ‘द ट्रायल : प्यार, कानून, धोखा’ या सीरिजच्या प्रमोशनमध्ये व्यग्र आहे. याच प्रमोशनदरम्यान दिलेल्या एका मुलाखतीत त्याने घटस्फोटाविषयी वक्तव्य केलं. आमिरने सांगितलं की तो सध्या खूप खुश आहे आणि आयुष्याचा सर्वांत चांगला काळ जगत आहे. याशिवाय त्याने अप्रत्यक्षपणे पूर्व पत्नी संजीदालाही तिच्या पुढील आयुष्यासाठी शुभेच्छा दिल्या आहेत. आमिर म्हणाला, “मी सर्वांना शुभेच्छा देतो आणि माझ्याबद्दल बोलायचं झाल्यास, मी माझ्या आयुष्यातील सर्वांत चांगला काळ व्यतीत करत आहे.”
View this post on Instagram
आमिर आणि संजीदा यांना आयरा ही मुलगी आहे. एका मुलाखतीत त्याने घटस्फोटानंतर संजीदाशी कोणताच संपर्क नसल्याचं स्पष्ट केलं होतं. “एखादं नातं कितीही परफेक्ट दिसत असलं तरी कधी कधी ते टिकत नाही. संजीदाला खूश ठेवणारा पार्टनर तिला मिळो. फक्त प्रेमासाठी दोन जणांनी एकत्र यावं. जर एकत्र येण्याचं कारण प्रेमाशिवाय दुसरं कोणतं तरी असेल तर समस्या तिथूनच निर्माण होतात”, असं आमिर म्हणाला होता.
‘टाइम्स ऑफ इंडिया’ला दिलेल्या मुलाखतीत आमिर पुढे म्हणाला होता, “माझ्यासाठी तो काळ खूप कठीण होता. घटस्फोटानंतर मी पूर्णपणे खचलो होतो. माझा स्वभाव अत्यंत उत्साही आहे आणि मी कधीच हार मानत नाही. मात्र संजीदाशी विभक्त झाल्यानंतर मला सावरायला काही वेळ गेला. मी पुन्हा पहिल्यासारखा झालोय, याचं मला समाधान आहे. मी कोणासाठीही वाईट विचार करत नाही आणि संजीदालाही तिचा आनंद मिळावा अशी माझी इच्छा आहे. प्रत्येकाला आनंदी राहण्याचा अधिकार आहे.”
