‘वेडात मराठे वीर दौडले सात’ चित्रपटाच्या शूटिंगदरम्यान मोठा अपघात; पन्हाळ गडाच्या तटबंदीवरून कोसळला तरूण
या चित्रपटात बॉलिवूड अभिनेता अक्षय कुमार हा छत्रपती शिवाजी महाराजांची भूमिका साकारतोय. त्याच्यासोबतच जय दुधाणे, उत्कर्ष शिंदे, विशाल निकम, विराट मडके, हार्दीक जोशी, सत्या, अक्षय, नवाब खान आणि प्रवीण तरडे यांच्याही भूमिका आहेत.
कोल्हापूर : महेश मांजरेकर दिग्दर्शित ‘वेडात मराठे वीर दौडले सात’ या चित्रपटाच्या शूटिंगदरम्यान मोठी दुर्घटना घडली आहे. कोल्हापुरातील पन्हाळगडावर या चित्रपटाची शूटिंग सुरू होती. ही शूटिंग सुरू असताना 19 वर्षांचा एक तरुण किल्ल्याच्या तटबंदीवरून 100 फूट खाली कोसळला. सूत्रांच्या माहितीनुसार हा तरुण गंभीर जखमी झाला आहे. त्याला शहरातील जवळच्या रुग्णालयात दाखल करण्यात आलं आहे. जखमी तरुणाचं नाव नागेश खोबरे असं आहे. शनिवारी रात्री जवळपास नऊ वाजताच्या सुमारास हा अपघात झाला. महेश मांजरेकर हे गेल्या काही दिवसांपासून पन्हाळगडावर त्यांच्या चित्रपटाची शूटिंग करत आहेत. शनिवारी रात्री शूटिंगदरम्यान किल्ल्यावरील तटबंदीवरून तरुणाचा तोल सुटला आणि तो 100 फूट खाली कोसळला.
पन्हाळगडावरील शूटिंगसाठी काही घोडे त्याठिकाणी आणले होते. याच घोड्यांची देखभाल नागेश करत होता. फोनवर बोलून झाल्यानंतर तो सज्जा कोटीच्या उत्तर दिशेला असलेल्या तटबंदीवरून खाली येत असताना त्याचा तोल ढासळला. तिथे उपस्थित असलेल्यांनी ताबडतोब त्याची मदत केली आणि त्याला रुग्णालयात दाखल करण्यात आलं.
खाली कोसळलेल्या नागेशला दोरीच्या सहाय्याने वर आणलं गेलं. या घटनेत नागेशच्या डोक्याला आणि छातीला जबर मार लागला आहे. त्याच्यावर कोल्हापुरातील सीपीआर रुग्णालयात उपचार सुरू होते. मात्र त्याची प्रकृती गंभीर असल्याने त्याला जवळच्या एका खासगी रुग्णालयात हलविण्यात आलं. याप्रकरणी अद्याप महेश मांजरेकरांची प्रतिक्रिया समोर आली नाही.
View this post on Instagram
या चित्रपटात बॉलिवूड अभिनेता अक्षय कुमार हा छत्रपती शिवाजी महाराजांची भूमिका साकारतोय. त्याच्यासोबतच जय दुधाणे, उत्कर्ष शिंदे, विशाल निकम, विराट मडके, हार्दीक जोशी, सत्या, अक्षय, नवाब खान आणि प्रवीण तरडे यांच्याही भूमिका आहेत. महेश मांजरेकर दिग्दर्शित हा चित्रपट यावर्षी दिवाळीच्या मुहूर्तावर प्रेक्षकांच्या भेटीला येणार आहे. मराठी, हिंदी, तमिळ आणि तेलुगू अशा चार भाषांमध्ये हा चित्रपट प्रदर्शित होणार आहे.
या चित्रपटाची घोषणा झाल्यानंतर त्यावरून खूप मोठा वाद निर्माण झाला होता. या चित्रपटात चुकीचे संदर्भ असून चुकीची नावं, तसंच मावळ्यांची वेशभूषादेखील चुकीची असल्याचा आरोप करण्यात आला आहे. संभाजीराजे छत्रपती यांनीसुद्धा या चित्रपटाला विरोध दर्शवला होता.
राज ठाकरेंमुळे अक्षयला मिळाली भूमिका
“मला छत्रपती शिवाजी महाराजांची भूमिका ही राज ठाकरेंमुळे मिळाली. त्यांनी मला आश्वासन दिलं की तू ही भूमिका साकारू शकतोस. माझ्यासाठी ही खूप मोठी गोष्ट आहे. या भूमिकेसाठी मी माझं सर्वस्व अर्पण करेन”, असं वक्तव्य अक्षयने चित्रपटाच्या घोषणेदरम्यान केलं होतं.
