Athiya Shetty-KL Rahul wedding: अथिया शेट्टी-केएल राहुलच्या लग्नाची तयारी सुरू; समोर आला पहिला व्हिडीओ
केएल राहुलच्या मुंबईतल्या घरी लग्नाची लगबग पहायला मिळतेय. याचा पहिला व्हिडीओ नुकताच सोशल मीडियावर आला आहे. पापाराझींनी या घराबाहेरचे व्हिडीओ शूट केले आहेत.
मुंबई: आणखी एक बॉलिवूड अभिनेत्री आणि क्रिकेटरची जोडी लग्नबंधनात अडकण्यासाठी सज्ज झाली आहे. टीम इंडियाचा स्टार फलंदाज केएल राहुल आणि अभिनेत्री अथिया शेट्टी यांच्या लग्नाच्या तयारीला सुरुवात झाली आहे. केएल राहुलच्या मुंबईतल्या घरी लग्नाची लगबग पहायला मिळतेय. याचा पहिला व्हिडीओ नुकताच सोशल मीडियावर आला आहे. पापाराझींनी या घराबाहेरचे व्हिडीओ शूट केले आहेत. येत्या 23 जानेवारी रोजी केएल राहुल आणि अथिया लग्नबंधनात अडकणार असल्याचं कळतंय.
केएल राहुलच्या मुंबईतल्या घराला सजावट करण्यात येत आहे. रोषणाईचा व्हिडीओ सोशल मीडियावर व्हायरल होत आहे. अथियाचे वडील आणि अभिनेते सुनील शेट्टी यांच्या खंडाळा इथल्या फार्महाऊसवर हे लग्न पार पडणार असल्याचं कळतंय. 21 जानेवारीपासून या लग्नापूर्वीच्या विविध कार्यक्रमांना सुरुवात होणार आहे. या लग्नाला मोजकेच पाहुणे उपस्थित राहणार आहेत.
संगीत कार्यक्रमात अथियाचे मित्रमैत्रिणी, भाऊ अहान शेट्टी, आई माया शेट्टी आणि वडील सुनील शेट्टी हे डान्स परफॉर्म करणार असल्याचंही समजतंय. या लग्नाला बॉलिवूडमधील फार कमी सेलिब्रिटी उपस्थित राहणार आहेत.
View this post on Instagram
अथिया आणि केएल राहुल हे त्यांच्या रिलेशनशिपविषयी माध्यमांसमोर कधीच मोकळेपणे बोलले नाहीत. मात्र सोशल मीडियावर एकमेकांविषयी प्रेम व्यक्त करण्यात दोघंही कधीच मागे हटत नाहीत. अथियाचा भाऊ अहान शेट्टीच्या ‘तडप’ या चित्रपटाच्या प्रीमिअरला जेव्हा केएल राहुलने हजेरी लावली, तेव्हा अप्रत्यक्षपणे त्यांनी नात्याची जाहीर घोषणा केली होती. यावेळी दोघांनी पापाराझींना फोटोसाठी एकत्र पोझ दिले होते.
अथियाने 2015 मध्ये ‘हिरो’ या चित्रपटातून बॉलिवूडमध्ये पदार्पण केलं. त्यानंतर ती मुबारकां (2017) आणि मोतीचूर चकनाचूर (2019) या दोन चित्रपटांमध्येच झळकली आहे. अथिया लवकरच फुटबॉलपटू अफशान आशिकचा बायोपिक ‘होप सोलो’मध्ये मुख्य भूमिकेत दिसणार असल्याचं वृत्त आहे.
