आई झाल्यानंतर आलिया भट्टची पहिली पोस्ट; सेलिब्रिटींकडून शुभेच्छांचा वर्षाव
'आमच्या आयुष्यातील सर्वोत्कृष्ट..'; आलिया भट्टच्या पोस्टवर कमेंट्सचा पाऊस
मुंबई- अभिनेत्री आलिया भट्टने रविवारी (6 नोव्हेंबर) मुलीला जन्म दिला. कपूर कुटुंबात सध्या जल्लोषाचं वातावरण आहे. रविवारी सकाळीच आलियाला मुंबईतील एच. एन. रिलायन्स रुग्णालयात दाखल करण्यात आलं होतं. यावेळी रणबीरसुद्धा तिच्यासोबत होता. त्यानंतर आलियाची आई सोनी राजदान आणि रणबीरची आई नीतू कपूर हे रुग्णालयात दाखल झाले. मुलीचा जन्म झाल्यानंतर आलियाने सोशल मीडियावर पहिली पोस्ट लिहिली आहे. या पोस्टमधून तिने आई झाल्याचा आनंद व्यक्त केला आहे.
‘आमच्या आयुष्यातील ही सर्वोत्कृष्ट बातमी आहे. आमचं बाळ या जगात आलं आहे आणि अत्यंत जादुई भासणारी ती कन्या आहे. आमच्यावर जणू प्रेमाचा वर्षाव झाला आहे. रणबीर आणि मी आता अधिकृतरित्या पालक झाले आहोत’, अशी पोस्ट आलियाने लिहिली आहे.
आलियाच्या या पोस्टवर सर्वसामान्यांसोबतच सेलिब्रिटींकडूनही शुभेच्छांचा वर्षाव होत आहे. ‘तुला खूप खूप शुभेच्छा आणि तुझ्या राजकुमारीला पाहण्याची वाट पाहत आहोत’, अशी कमेंट सोनम कपूरने केली. तर ‘तुम्हा दोघांना शुभेच्छा. सदैव आनंदी आणि स्वस्थ राहा’, अशा शब्दांत श्वेता बच्चनने शुभेच्छा दिल्या आहेत.
View this post on Instagram
झोया अख्तर, सोफी चौधरी, नेहा धुपिया, रोहन श्रेष्ठा, कपिल शर्मा, रिया कपूर, इशान खट्टर, मौनी रॉय, सानिया मिर्झा यांसारख्या सेलिब्रिटींनीही आलियाच्या या पोस्टवर कमेंट्स आणि शुभेच्छांचा वर्षाव केला आहे.
27 जून रोजी आलियाने तिच्या प्रेग्नन्सीची घोषणा केली होती. इन्स्टाग्रामवर अल्ट्रासाऊंडचा फोटो पोस्ट करत तिने चाहत्यांना गुड न्यूज दिली होती. आलिया आण रणबीरने मुंबईत एप्रिल महिन्यात लग्नगाठ बांधली. घरच्या घरीच मोजक्या कुटुंबीयांच्या आणि पाहुण्यांच्या उपस्थितीत हा लग्नसोहळा पार पडला होता.
