‘पुष्पा 2’मधील आयटम साँगसाठी समंथा नाही तर ‘या’ प्रसिद्ध अभिनेत्रीची निवड
अल्लू अर्जुन आणि रश्मिका मंदाना यांचा ‘पुष्पा : द राइज’ हा चित्रपट 2021 च्या अखेरीस प्रदर्शित झाला होता. मूळ तेलुगू चित्रपटाने बॉक्स ऑफिसवर अक्षरश: धुमाकूळ घातला होता आणि त्यानंतर त्याचं इतर भाषांमध्ये डबिंग झालं.
‘पुष्पा: द रूल’ या चित्रपटाची प्रतीक्षा असंख्य प्रेक्षकांना आहे. ‘पुष्पा: द राइज’ या पहिल्या भागाने बॉक्स ऑफिसवर तगडी कमाई केली होती. अल्लू अर्जुन, रश्मिका मंदाना, फहाद फाजिल यांच्या भूमिका असलेल्या या चित्रपटात अभिनेत्री समंथा रुथ प्रभूचा आयटम साँग होता. ‘ऊ अंटावा’ हे तिचं गाणं तुफान गाजलं होतं. आजही पार्ट्यांमध्ये हे गाणं वाजवलं जातं. विशेष म्हणजे समंथाच्या करिअरमधील हा पहिलावहिला आयटम साँग होता. त्यानंतर आता ‘पुष्पा 2’मध्ये कोणत्या अभिनेत्रीचा आयटम साँग असेल, असा प्रश्न प्रेक्षकांना पडला होता. त्याचं उत्तर आता मिळालं आहे. या दुसऱ्या भागात बॉलिवूडची प्रसिद्ध अभिनेत्री आयटम साँग करणार असल्याचं कळतंय.
‘पुष्पा 2′ हा चित्रपट प्रदर्शित होण्यासाठी अडीच महिना शिल्लक असताना त्यात एका नव्या अभिनेत्रीची एण्ट्री झाली आहे. ‘पुष्पा: द रुल’मध्येही धमाकेदार आयटम साँग असणार आहे. मात्र त्यात समंथा नाही तर दुसरी अभिनेत्री झळकणार आहे. सुरुवातीला अभिनेत्री दिशा पटानीच्या नावाची चर्चा होती. मात्र दिशा नव्हे तर ‘ॲनिमल’ फेम तृप्ती डिमरी यामध्ये आयटम साँग करणार असल्याचं कळतंय. येत्या जून महिन्यात या गाण्यासाठी शूटिंग करण्यात येणार आहे. त्यासाठी स्पेशल सेटसुद्धा तयार केला जातोय.
View this post on Instagram
संदिप रेड्डी वांगा दिग्दर्शित ‘ॲनिमल’ या चित्रपटानंतर तृप्तीला रातोरात लोकप्रियता मिळाली. ‘नॅशनल क्रश’ म्हणून ती सोशल मीडियावर प्रसिद्ध झाली. हा चित्रपट तिच्या करिअरसाठी खूपच खास ठरला होता. सध्या ती कार्तिक आर्यनसोबत ‘भुलभलैय्या 3’ या चित्रपटासाठी शूटिंग करतेय. याशिवाय ती एका रोमँटिक चित्रपटातून प्रेक्षकांच्या भेटीला येणार आहे. तृप्तीच्या हाती आणखी एक प्रोजेक्ट लागला असून त्यात ती राजकुमार राव आणि विकी कौशलसोबत काम करणार आहे.
‘पुष्पा: द राईज’ या पहिल्या भागाचे ओटीटी हक्क ॲमेझॉन प्राइम व्हिडीओने 30 कोटी रुपयांना विकत घेतले होते. आती सीक्वेलसाठी निर्मात्यांनी नेटफ्लिक्स या ओटीटी प्लॅटफॉर्मकडे तिप्पट रकमेची मागणी केली आहे. इतकंच नव्हे तर दिग्दर्शक सुकुमार यांना ओटीटीच्या या करारातून काही भाग मिळणार आहे. ‘पुष्पा 2’चे डिजिटल हक्क हे तब्बल 100 कोटींना विकले गेल्याचं कळतंय.
