Avneet Kaur : मुंबईत घर, महागड्या गाड्या, 22 वर्षीय अवनीत कौरची थक्क करणारी संपत्ती
अवनीत कौर अवघ्या 22 व्या वर्षी सोशल मीडिया स्टार बनली आहे. तिने बऱ्याच मालिकांमध्ये काम केलं आहे. इन्स्टाग्रामवर तिचा मोठा चाहतावर्ग आहे. वयाच्या 22 व्या वर्षी अवनीतची एकूण संपत्ती जवळपास 7 कोटी रुपयांच्या घरात आहे. तिचे इन्स्टाग्रामवर 32 दशलक्षांहून अधिक फॉलोअर्स आहेत.
मुंबई | 13 ऑक्टोबर 2023 : टेलिव्हिजनपासून बॉलिवूडपर्यंत आपली दमदार छाप सोडणारी अभिनेत्री अवनित कौर सोशल मीडियावर बरीच सक्रीय असते. इन्स्टाग्रामवर तिचे तीन कोटींपेक्षा जास्त फॉलोअर्स आहेत. गेल्या काही दिवसांपासून अवनीत तिच्या बॉलिवूड पदार्पणामुळेही चर्चेत आहे. वयाच्या अवघ्या 22 व्या वर्षी तिने प्रचंड लोकप्रियता मिळवली आहे. केवळ भारतातच नाही तर परदेशातही तिचा मोठा चाहतावर्ग आहे. बऱ्याच वर्षांपूर्वी अवनीतचं कुटुंब जालंधरहून मुंबईला आलं होतं. वयाच्या अवघ्या आठव्या वर्षीच तिने तिचं करिअर निश्चित केलं होतं.
अवनीतने वयाच्या आठव्या वर्षापासूनच विविध डान्स शोजमध्ये भाग घेण्यास सुरुवात केली होती. यासोबतच तिने तिचं शालेय शिक्षणसुद्धा सुरू ठेवलं होतं. मुंबईतल्या एका खासगी कॉलेजमधून तिने कॉमर्समध्ये पदवीचं शिक्षण पूर्ण केलं आहे. अवनीत ‘डान्स इंडिया डान्स लिटिल मास्टर्स’ आणि ‘डान्स के सुपरस्टार्स’ यांसारख्या रिअॅलिटी शोजमध्ये स्पर्धक म्हणून झळकली होती. आपल्या दमदार परफॉर्मन्सने तिने परीक्षक आणि प्रेक्षकांची मनं जिंकली होती.
अवनीतने 2012 मध्ये छोट्या पडद्यावर अभिनेत्री म्हणून करिअरची सुरुवात केली. ‘मेरी माँ’ या मालिकेतून तिने पदार्पण केलं होतं. मात्र तिला खरी ओळख ‘अलादीन- नाम तो सुना होगा’ या मालिकेतून मिळाली. याशिवाय टिक-टॉकवरही तिचा मोठा चाहतावर्ग होता. खऱ्या आयुष्यात अवनीत फारंच आलिशान आयुष्य जगते.
अवनीतची एकूण संपत्ती ही जवळपास 7 कोटी रुपयांच्या घरात असल्याचं म्हटलं जातं. तिच्या कमाईतील मोठा भाग हा जाहिराती आणि सोशल मीडिया पोस्टद्वारे येतो. दर महिन्याला ती जाहिराती आणि प्रमोशनल पोस्टद्वारे जवळपास 8 लाख रुपये कमावते. याशिवाय म्युझिक व्हिडीओ, टीव्ही आणि चित्रपटांमधूनही तिची जवळपास कोटी रुपयांची कमाई होते.
अवनीतचं मुंबई हक्काचं घरसुद्धा आहे. हे घर तिने नुकतंच विकत घेतलं आहे. अवनीत तिच्या आई-वडिलांसोबत राहते. तिला महागड्या आणि आलिशान गाड्यांचीही आवड आहे. तिच्याकडे 80 लाख रुपयांची रेंज रोव्हर, हुंडाई क्रेटा, स्कोडाची कोडियाक आणि टोयाटाची फॉर्च्युनर एसयूव्ही यांसारख्या महागड्या गाड्या आहेत.
