Shah Rukh Khan: एअरपोर्टवर चाहत्याने हात पकडताच भडकला शाहरुख; आर्यनने वडिलांना सावरलं
हा व्हिडीओ सध्या सोशल मीडियावर व्हायरल होत असून नेटकरी संबंधित चाहत्यावर टीका करत आहेत. 'हे अत्यंत चुकीचं वागणं आहे', असं एकाने म्हटलं. तर 'त्यांचं खासगीपण जपा' असं दुसऱ्या युजरने लिहिलं.
बॉलिवूड सेलिब्रिटींचे चाहते त्यांच्या आवडत्या स्टार्सना भेटण्यासाठी किंवा त्यांच्यासोबत सेल्फी घेण्यासाठी खूपच उत्सुक असतात. अनेकदा हे सेलिब्रिटी चाहत्यांच्या गर्दीने घेरले जातात किंवा गर्दीत त्यांच्याशी गैरवर्तन झाल्याचं अनेकदा घडलं आहे. असाच काहीसा प्रकार बॉलिवूडचा सुपरस्टार शाहरुख खानसोबत (Shah Rukh Khan) विमानतळावर घडला. मात्र हा चाहता शाहरुखच्या आणखी जवळ येण्याआधीच त्याचा मुलगा आर्यनने मध्ये येत वडिलांना सावरलं. रविवारी संध्याकाळी शाहरुख त्याच्या दोन्ही मुलांसोबत मुंबई विमानतळावर दिसला. एअरपोर्टवर आर्यन खान आणि त्याचा लहान भाऊ अबरामही त्याच्यासोबत होता. दरम्यान एका चाहत्याने मध्येच येऊन शाहरुखचा हात पकडून सेल्फी (Selfie) घेण्याचा प्रयत्न केला. ज्यामुळे शाहरुखला धक्काच बसला. शाहरुखने रागाच्या भरात लगेच हात झटकला आणि मागे गेला. इतक्यात आर्यन (Aryan Khan) पुढे येऊन वडील आणि भावाच्या मध्ये उभा राहिला.
हा व्हिडीओ सध्या सोशल मीडियावर व्हायरल होत असून नेटकरी संबंधित चाहत्यावर टीका करत आहेत. ‘हे अत्यंत चुकीचं वागणं आहे’, असं एकाने म्हटलं. तर ‘त्यांचं खासगीपण जपा’ असं दुसऱ्या युजरने लिहिलं. ‘शाहरुख त्याच्या मुलांसोबत होता. सेलिब्रिटी म्हणजे पब्लिक प्रॉपर्टी नसतात हे समजलं पाहिजे’ असंही एकाने म्हटलंय.
पहा व्हिडीओ-
View this post on Instagram
शाहरुख खान सध्या राजकुमार हिरानी यांच्या ‘डंकी’ या चित्रपटाच्या शूटिंगमध्ये व्यस्त आहे. लंडनमध्ये तो तापसी पन्नूसोबत या चित्रपटाचं शूटिंग करत होता. लवकरच या चित्रपटाच्या पुढील शेड्यूलचं शूटिंग पंजाबमध्ये होणार आहे. याशिवाय शाहरुखच्या आगामी ‘पठान’ या चित्रपटाचीही प्रचंड उत्सुकता आहे. यामध्ये त्याच्यासोबत दीपिका पदुकोण आणि जॉन अब्राहम दिसणार आहेत. या दोन चित्रपटांशिवाय शाहरुख दक्षिणेतील दिग्दर्शक अटलीसोबत ‘जवान’ या अॅक्शन चित्रपटासाठीदेखील शूट करणार आहे. या चित्रपटात शाहरुखसोबत साऊथची अभिनेत्री नयनतारा दिसणार आहे.
