Crime Patrol: ‘क्राईम पेट्रोल’मध्ये दाखवलं श्रद्धा मर्डर केस; वादानंतर Sony ने मागितली माफी, सांगितलं सत्य
क्राईम पेट्रोलमधील एपिसोडमुळे सोनी वाहिनीला मागावी लागली माफी; जाणून घ्या नेमकं काय आहे प्रकरण?
मुंबई: ‘क्राईम पेट्रोल’च्या एका एपिसोडमुळे सोनी वाहिनी वादात सापडली आहे. या शोच्या नुकत्याच पार पडलेल्या एका एपिसोडमध्ये एका तरुणीची कथा दाखवण्यात आली होती. या तरुणीचा पार्टनर तिची हत्या करून तिच्या मृतदेहाचे तुकडे करतो. क्राईम पेट्रोलच्या या एपिसोडमध्ये दिल्लीतल्या श्रद्धा वालकरची घटना दाखवल्याची तक्रार काही प्रेक्षकांनी केली.
श्रद्धा वालकर आणि आफताब पूनावाला यांच्या घटनेचा तपास अद्याप दिल्ली पोलीस करत आहे. या धक्कादायक घटनेनं संपूर्ण देश हादरलं होतं. अशातच श्रद्धाच्या हत्येच्या घटनेशी मिळती जुळती कथा क्राईम पेट्रोलमध्ये पाहिल्यानंतर प्रेक्षकांना धक्काच बसला. सोशल मीडियावर नेटकऱ्यांनी याविषयी नाराजी व्यक्त केली. याप्रकरणी आता वाहिनीने जाहीर माफी मागितली आहे.
क्राईम पेट्रोलच्या या एपिसोडमध्ये दाखवलेल्या कथेत तथ्यांशी छेडछाड केल्याची तक्रार प्रेक्षकांनी केली. म्हणून सोशल मीडियावर वाहिनी आणि शो विरोधात बॉयकॉटचा ट्रेंड सुरू झाला. लोकांचा राग आणि नाराजी पाहता सोनी वाहिनीने त्यांच्या ओटीटी प्लॅटफॉर्मवरून हा एपिसोड काढून टाकला.
सोनी वाहिनीचं स्पष्टीकरण –
सोनी वाहिनीकडून पोस्ट करण्यात आलेल्या या जाहीर माफिनाम्यात लिहिलं आहे, ‘क्राईम पेट्रोलमध्ये नुकताच दाखवण्यात एपिसोड हा काही दिवसांपूर्वी घडलेल्या घटनेवर आधारित असल्याचं काही प्रेक्षकांनी म्हटलंय. आम्ही हे सांगू इच्छितो की ही एपिसोडमध्ये दाखवलेली कथा ही काल्पनिक आहे. 2011 मध्ये घडलेल्या काही घटनांवरून याची काल्पनिक लिहिण्यात आली आहे. त्यामुळे नुकत्याच घडलेल्या घटनेशी याचा काही संबंध नाही. जर कोणाच्या भावना दुखावल्या असतील तर आम्ही माफी मागतो. हा एपिसोड आम्ही हटवला आहे.’
— Sony LIV (@SonyLIV) January 2, 2023
शोमध्ये नेमकं काय दाखवलं?
क्राईम पेट्रोलच्या या एपिसोडमध्ये आफताबला हिंदू मुलगा मिहिर आणि श्रद्धा वालकरला ख्रिश्चन मुलगी ॲनाच्या रुपात दाखवलं गेलं. या दोघांचं लग्न मंदिरात झाल्याचं एपिसोडमध्ये दाखवलं गेलं. यामुळे सोशल मीडियावर नेटकऱ्यांनी राग व्यक्त केला. यानंतर काही क्लिपसुद्धा व्हायरल झाले होते.
