गर्लफ्रेंड सबासाठी हृतिक रोशनने घेतला मोठा निर्णय? काय आहे ‘मन्नत’शी कनेक्शन?
प्रेमासाठी कायपण! रिलेशनशिपमध्ये हृतिक-सबाचं एक पाऊल पुढे
मुंबई: अभिनेता हृतिक रोशन हा गेल्या काही महिन्यांपासून अभिनेत्री सबा आझादला डेट करतोय. हे दोघं सोशल मीडियावर एकमेकांविषयी प्रेम जाहीर करताना दिसतात. इतकंच नव्हे तर विविध कार्यक्रमांमध्येही त्यांनी एकत्र हजेरी लावली. सबा आणि हृतिकला अनेकदा एकत्र व्हेकेशनवरही जाताना पाहिलं गेलं आहे. आपल्या नात्याबद्दल हे दोघं मोकळेपणे व्यक्त होत असतानाच आता हृतिकने सबासाठी मोठा निर्णय घेतल्याचं कळतंय. हृतिक आणि सबा लिव्ह इन रिलेशनशिपमध्ये राहणार असल्याचं कळतंय.
हृतिक आणि सबा हे गेल्या काही दिवसांपासून लिव्ह-इनमध्ये राहण्याचा विचार करत होते. अखेर दोघांनी एक घरसुद्धा पसंत केलं आहे. मुंबईतील ‘मन्नत’मध्ये हे दोघं एकत्र राहणार आहेत. आता मन्नत म्हटल्यावर अनेकांना शाहरुख खानचा बंगला आठवत असेल. मात्र हृतिक आणि सबा ज्याठिकाणी राहणार आहेत, त्या इमारतीचं नावसुद्धा मन्नत आहे.
या इमारतीतील वरचे मजले हे नव्याने बांधण्यात आले आहेत. त्यामुळे हृतिक आणि सबा लवकरच तिथे राहण्यासाठी जाणार आहेत. हृतिकने याआधी त्याच्या दोन घरांसाठी तब्बल 100 कोटी रुपये खर्च केले आहेत. जुहू-वर्सोवा लिंक रोडजवळ ही दोन घरं आहेत. आता सबासोबत राहण्यासाठी त्याने 30 कोटी रुपये खर्च केल्याचं कळतंय.
View this post on Instagram
हृतिक आणि सुझान खान यांचा घटस्फोट झाल्यानंतर दोघंही आपापल्या आयुष्यात पुढे गेल्याचं पहायला मिळतंय. हृतिक सबाला डेट करत असतानाच सुझान ही अर्सलान गोणीला डेट करतेय. हृतिक आणि सुझानला हृदान आणि रेहान ही दोन मुलं आहेत. विशेष म्हणजे सबा आणि सुझान यांच्याचही चांगली मैत्री झाली आहे.
हृतिक आणि सबाच्या वयात जवळपास 17 वर्षांचं अंतर आहे. हृतिकच्या कुटुंबीयांशीही सबाची जवळीक वाढली आहे. त्याच्या कुटुंबीयांसोबत मिळून तिने जेवण केलं होतं. त्याचे फोटो सोशल मीडियावर व्हायरल झाले होते. हृतिक आणि सबाची पहिल्यांदा ओळख ही ट्विटरवर झाल्याचं म्हटलं जातं. हृतिकने ट्विटरवर एक व्हिडीओ शेअर केला होता. त्या व्हिडीओमध्ये सबा एका रॅपरसोबत दिसत होती. त्यानंतर सबाने हृतिकचे आभार मानले आणि दोघांचा संवाद सुरू झाला.
