KBC 14: साडेसात कोटींच्या प्रश्नावर लागला लॉक; हरणार की इतिहास रचणार?
'केबीसी'च्या चाहत्यांची उत्सुकता शिगेला; बिग बीसुद्धा होणार भावूक!
मुंबई- अमिताभ बच्चन (Amitabh Bachchan) यांच्या ‘कौन बनेगा करोडपती 14’ (Kaun Banega Crorepati 14) या शोला दुसरा करोडपती मिळाला आहे. शाश्वत गोयल (Shashwat Goel) या स्पर्धकाने एक कोटीच्या प्रश्नाचं उत्तर अचूक दिलं आहे. आता ते या खेळाच्या अंतिम टप्प्यात पोहोचले आहेत. शाश्वत यांच्यासमोर साडेसात कोटी रुपयांचा प्रश्न आहे. या जॅकपॉट प्रश्नाचं उत्तर ते देऊ शकणार की नाही, हे पाहणं औत्सुक्याचं ठरणार आहे.
केबीसीच्या नव्या एपिसोडचा प्रोमो नुकताच सोशल मीडियावर पोस्ट करण्यात आला आहे. यामध्ये शाश्वत गोयल हे रडताना दिसत आहेत. शाश्वत रडत असताना त्यांना दिलासा देण्यासाठी एक जण म्हणतोय की त्यांना आईचा आशीर्वाद मिळाला आहे. जे काही घडलं ते त्यांच्या आईमुळे घडलंय. त्यानंतर सूत्रसंचालक अमिताभ बच्चन त्यांच्यासमोर साडेसात कोटींचा प्रश्न सादर करतात.
2013 पासून कौन बनेगा करोडपतीमध्ये येण्याचा प्रयत्न करत असल्याचं शाश्वत या शोमध्ये सांगतात. आपल्या मुलाने एकदा तरी केबीसीच्या हॉटसीटवर बसावं, अशी त्यांच्या आईची इच्छा होती. मात्र आज जेव्हा ते हॉटसीटवर बसून एक कोटी रुपये जिंकले आहेत, तेव्हा त्यांची आई या जगात नाही.
View this post on Instagram
शोमध्ये शाश्वत यांना रडताना पाहून अमिताभ बच्चन यांच्या डोळ्यातही अश्रू येतात. शाश्वत एका प्रश्नाचं उत्तर लॉक करायला सांगतात, त्यानंतर बिग बी त्या उत्तराला लॉक करतात. इथेच हा प्रोमो संपतो. त्यामुळे या एपिसोडची प्रेक्षकांमध्ये प्रचंड उत्सुकता आहे.
शाश्वत गोयल यांच्या आधी कविता चावला नावाच्या एका महिलेनं केबीसी 14 मध्ये एक कोटी रुपये जिंकले होते. कविता यांनी फक्त बारावीपर्यंतच शिक्षण घेतलं होतं. त्यांना पुढचं शिक्षण घेण्याची इच्छा होती, मात्र वडिलांनी त्यासाठी परवानगी दिली नाही.
कौन बनेगा करोडपती 14 च्या या आठवड्याच्या एपिसोडमध्ये बिग बींचा वाढदिवससुद्धा साजरा केला जाणार आहे. 11 ऑक्टोबर रोजी बिग बींच्या पत्नी जया बच्चन आणि मुलगा अभिषेक बच्चन सहभागी होणार आहेत. दोघं मिळून बिग बींसोबत केबीसीचा खेळ खेळतात. या एपिसोडच्या प्रोमोमध्येही बिग बी भावूक होताना पहायला मिळतात.
